Amwe mu makipe akinamo abanyarwanda hanze yarwo, ntabwo yahiriwe n'impera z'icyumweru aho Zanaco FC ikinamo Nizeyimana Mirafa yatwawe igikombe cya shampiyona na Zesco Unioted, ni mu gihe Yannick Mukunzi n'ikipe ye babuze amanota 3.
Ntabwo amakipe yose akinamo abanyarwanda hanze yarwo yakinnye, muri iyi nkuru tugiye kugaruka ku makipe yari yakomeje shampiyona n'uko abakinnyi babanyarwanda bagiye babyitwaramo.
Shampiyona ya Zambia yaraye yegukanywe na Zesco United nyuma yo gutsinda Napsa Stars 2-0, iyi kipe ifite amanota 64 mu gihe hasigaye imikino 3, Zanaco FC ikinamo Nizeyimana Mirafa utarakinira iyi kipe umukino n'umwe, niyo iri ku mwanya wa 2 n'amanota 53 niyo yatsinda imikino yose isigaye uhereye ku wo bazakina na Nkana ku wa 3 ntabwo bageza amanota afitwe na Zesco United.
Mu cyiciro cya kabiri mu Misiri, Iranzi Jean Claude yari mu kibuga ku wa Kane w'icyumweru gishize ubwo ikipe ye ya Pharco FC yanganyaga na Abu Qair Semad 0-0 mu mukino w'umunsi wa 27 wa shampiyona. Mu gihe habura iminsi 5 ngo shampiyona isozwe, iyi kipe iri ku mwanya wa 2 n'amanota 55 k'urutonde ruyobowe na Hars El Hodood na 58.
Ntabwo zari impera z'icyumweru nziza kuri Yannick Mukunzi n'ikipe ye ya Sandvinkes IF mu cyiciro cya gatatu muri Sweden kuko babuze amahirwe yo kugabanya ikinyuranyo cy'amanota barushwa n'ikipe ya mbere ku rutonde rwa shampiyona, ni nyuma y'uko baraye batsinzwe na Hammarby Talang 3-2 mu mukino w'umunsi wa 11.
Wari umukino wa kabiri Yannick Mukunzi akinnye kuva akirutse imvune bikaba bitamugendekeye neza kuko babuze intsinzi.
Uyu mukinnyi yakinnye iminota 79 ava mu kibuga asimbuwe na Noa Ersa Engberg. Iyi kipe ni iya kabiri n'amanota 23 k'urutonde ruyobowe na Brommapojkarna n'amanota 27.
Muri iki gihugu kandi cya Sweden, rutahizamu wa FC Eskilstuna mu cyiciro cya 2, wahamagawe n'Amavubi ku nshuro ya mbere ntaze, Rafael York yari mu kibuga akina iminota 90 mu mukino ikipe ye yanganyijemo na Falkberg 1-1 mu mukino w'umunsi wa 10.
Iyi kipe iri ku mwanya wa 10 n'amanota 12, urutonde ruyobowe na Landskrona ifite 19.
Umunyezamu Twizere Buhake Clement wari mu Rwanda mu ikipe y'igihugu, ntabwo yari muri 18 ikipe ye ya Strommen IF mu cyiciro cya kabiri muri Norway yakoresheje ku wa Gatandatu bakina na Hamkam mu mukino w'umunsi 5.
Uyu mukino waje gutsindwa na Hamkam 2-0. Iyi kipe iri ku mwanya wa nyuma n'amanota 2, Fredrikstad ya mbere ifite 13.
