Byatangajwe kuri uyu wa Gatatu tariki 12 Gicurasi 2021 ubwo Guverinoma y'u Rwanda yamurikiraga Inteko Ishinga Amategeko Umutwe w'Abadepite na Sena, imbanzirizamushinga y'ingengo y'imari y'umwaka utaha wa 2021-2022.
Umunyamabanga wa Leta muri Minisiteri y'Imari n'Igenamigambi ushinzwe Imari ya Leta, Richard Tusabe yavuze ko Ingengo y'Imari y'umwaka utaha wa 2021-2022 biteganyijwe ko izagera kuri miliyari 3 807 Frw ivuye kuri miliyari 3 464 Frw yari mu ngengo y'imari ivuguruye y'uyu mwaka wa 2020-2021.
Yavuze ko 67% by'iyo ngengo y'imari azaturuka imbere mu gihugu, 16% aturuke mu nkunga z'amahanga, naho 17% akazaba ari inguzanyo z'amahanga.
Ingengo y'imari y'uyu mwaka turi gusoza, yatangiye ari Miliyari 3 245,7 Frw mu kuyivugurura igera kuri Miliyari 3 464,8 Frw. Ni ukuvuga ko yiyongereyeho Miliyari 219,1 Frw angana na 6,7%.
Ubwo yamurikiraga Inteko Ishinga Amategeko, iyi ngengo y'imari y'uyu mwaka, Minisitiri w'Imari n'Igenamigambi, Dr Uzziel Ndagijimana, yagaragaje ko amafaranga akomoka imbere mu gihugu habariwemo n'inguzanyo z'imbere mu gihugu yageze kuri miliyari 1 962,8Frw angana na 60.5% by'ingengo y'imari yose y'umwaka wa 2020-2021.
Naho inkunga z'amahanga zari miliyari 492,5 Frw angana na 15.2%, naho inguzanyo z'amahanga zikaba miliyari 783,4Frw angana na 24.1%.
UKWEZI.RW
Source : http://www.ukwezi.rw/mu-rwanda/3/article/Ingengo-y-Imari-y-umwaka-utaha-iziyongeraho-10
