Perezida Kagame na Madamu we bakingiwe Covid-19 [AMAFOTO] #rwanda #RwOT

Kuri uyu wa Kane tariki ya 11 Werurwe 2021,Perezida Kagame na Madamu we Jeannette Kagame bakingiwe Covid-19 ku mugaragaro.

Kuri uyu munsi wa Gatandatu u Rwanda rutangiye ku mugaragaro ibikorwa byo gukingira icyorezo cya Covid-19 gikomeje koreka isi yose,Nyakubahwa Perezida Kagame na Madamu we Jeannette Kagame bakingiwe Covid-19.

Aba banyacyubahiro bakingiriwe ku Bitaro byitiriwe Umwami Faisal ku Kacyiru mu Mujyi wa Kigali.

Mu minsi ishize perezida Kagame yavuze ko ari iby'agaciro kuba urukingo rwa Covid-19 rwageze muri Afurika by'umwihariko mu Rwanda.

Ati 'Habayeho gutegereza igihe kirekire, bamwe bakoze ibikenewe neza ndetse bari biteguye... twirengagije ko hari bamwe bagaragaye 'nk'abari hejuru y'abandi' kandi mu gihe twese tuzikeneye mu buryo bwihuse. Ubu ni amakuru meza kubona inkingo za COVID-19 zigera muri Afurika hatangiriwe kuri Ghana... muri iki gitondo u Rwanda n'abandi. Murakoze #Covax.'

Umukuru w'Igihugu cyo kimwe n'abandi bakingiwe Covid-19 bagomba guhabwa urukingo inshuro ebyiri, ni ukuvuga ko nyuma y'ibyumweru bine bazahabwa urundi.

Minisiteri y'ubuzima ivuga ko abantu bagera ku 230,000 bamaze gukingirwa mu Rwanda, muri gahunda yatangiye ku mugaragaro mu cyumweru gishize.

Abari gukingirwa ni abo leta yavuze ko bafite ibyago byo kwibasirwa n'iki cyorezo kurusha abandi.

U Rwanda ruri gukingira rukoresheje doze z'inkingo zirenga gato 300,000 za AstraZeneca na Pfizer rwakiriye muri gahunda ya Covax mu cyumweru gishize.

Mu kwezi kwa kabiri, hari abantu bakingiwe mu Rwanda hakoreshejwe inkingo leta yavuze ko yabonye ari nkeya zivuye mu bufatanye n'amahanga.

Kuwa Gatanu w'icyumweru gishize ubwo hatangiraga gahunda yo gutanga uru rukingo,Minisitiri w'Ubuzima,Dr Daniel Ngamije yabaye mu ba mbere batewe urukingo rw'icyorezo cya COVID-19, mu muhango wo gutangiza igikorwa cy'ikingira ku rwego rw'Igihugu wabereye mu Bitaro bya Masaka biherereye mu Mujyi wa Kigali.

Minisiteri y'Ubuzima yatangaje ko Minisitiri Dr. Ngamije yafashe urukingo rwa mbere hamwe na Dr Kasonde Mwinga uhagarariye Ishami ry'Umuryango w'Abibumbye ryita ku Buzima (OMS) mu Rwanda.





Source : http://umuryango.rw/amakuru/mu-rwanda/ubuzima/article/perezida-kagame-na-madamu-we-bakingiwe-covid-19

Post a comment

0 Comments