Maracana Stadium yamamaye ku isi igiye kwitirirwa igihangange Pelé #rwanda #RwOT

Guhindura izina ry'iyi stade byemejwe n'inteko ishingamategeko ya leta ya Rio de Janeiro, yavuze ko izitwa Rei Pele stadium.

Edson Arantes do Nascimento ni amazina ya Pelé ubu ufite imyaka 80, naho Rei ni ijambo ry'igiportugal risobanura Umwami.

Guverineri wa leta ya Rio de Janeiro agomba gusinya yemeza ibyemejwe n'inteko mbere y'uko byemezwa burundu.

Pelé, watwaye ibikombe bitatu by'isi ari kumwe na Brazil, yatsindiye igitego cye kigira 1,000 kuri iyi stade mu 1969 ubwo ikipe ya Santos yakinaga na Vasco da Gama.

Maracana yakiriye imikino ya nyuma y'igikombe cy'isi cyo mu 1950 no mu 2014, yakiriye kandi ibirori byo gutangiza imikino olempike mu 2016.

Mu 1950 bivugwa ko abantu barenga 200,000 bari muri iyi stade bareba Uruguay itsinda Brazil ku mukino wa nyuma w'igikombe cy'isi, nubwo ubundi ubushobozi bwayo ari abantu 78,838.

Iyi stade ubundi yitiriwe umunyamakuru Mario Filho waharaniye ko yubakwa mu myaka ya 1940, ariko imenyekana cyane nka Maracana kuko ari izina ry'agace yubatsemo.

Tariki 01 Ukwakira mu 1977 nibwo Pele yakinnye umukino we wa nyuma nk'umukinnyi wabigize umwuga.

Mu gihe uyu munya-Brazil yakinaga yari icyamamare bikomeye, ndetse yamaze igihe runaka ari we mukinnyi uhembwa amafaranga menshi kurusha abandi bose muri siporo zose ku isi.

Afite umuhigo wemejwe na Guinness World Records ko yatsinze ibitego 1,281 mu mikino 1,363 yemewe yakinnye.

Yari rutahizamu w'ubuhanga butangaje, rimwe na rimwe akanasubira inyuma agakina hagati afasha abasatira kubera ubuhanga yari afite mu gucenga no gutanga umupira aho ashatse.

Pelé yakiniye amakipe abiri gusa by'umwuga, Santos y'iwabo yakiniye imyaka 18, na New York Cosmos muri Amerika yakiniye imyaka ibiri.

Ku wa gatandatu tariki 01/10/1977 kuri stade ya New York Cosmos habereye umukino wa nyuma wo gusezera kuri Pelé wari uhagaritse ruhago ku myaka 37, wahuje Cosmos na Santos.

Ni umukino wari wahuruje abantu benshi cyane, barimo se n'umugore we, ndetse n'icyamamare mu iteramakofe Muhammad Ali ntiyari yatanzwe.

Igice cya mbere cy'uyu mukino yagikinnye mu ikipe ya Cosmos, igice cya kabiri agikina ari muri Santos. Umukino warangiye Cosmos itsinze Santos 2 -1.

Muri uwo mukino, igitego Pelé yatsindiye Cosmos kuri 'coup-franc' yatereye mu ntambwe 27, ni cyo gitego cya nyuma yatsinze nk'umukinnyi wabigize umwuga.

Muri uwo mukino, mu gice cya kabiri imvura yaraguye, bituma ibinyamakuru byo muri Brazil bivuga ko "n'ikirere cyagize agahinda kirarira".

Pelé ubu ari iwabo mu zabukuru aho amaze igihe yugarijwe n'indwara ziva ku ntege nke z'umubiri.


Stade ya Maracana yiswe "Rei Pele"
BBC



Source : http://umuryango.rw/imyidagaduro/imikino/article/maracana-stadium-yamamaye-ku-isi-igiye-kwitirirwa-igihangange-pele

Post a comment

0 Comments