Umutoza Adil Erradi wa APR FC yatanze ihumure ku bafana ba APR FC abizeza ko rutahizamu w'iyi kipe, Jacques Tuyisenge yiteguye umukino wo ku wa Gatandatu na Gor Mahia, ni mu gihe hari impungenge ko atazakina bitewe n'imvune yagiriye mu ikipe y'igihugu.
APR FC izakira Gor Mahia ku wa Gatandatu w'iki cyumweru mu mu mukino ubanza w'ijonjora ry'ibanze rya CAF Champions League.
Hari impungenge z'uko izakina uyu mukino idafite rutahizamu wayo Jacques Tuyisenge wagiriye ikibazo cy'imvune mu mukino Amavubi yanganyijemo na Cape Verde tariki ya 17 Ugushyingo 2020 mu gushaka itike y'igikombe cy'Afurika cya 2022.
Umutoza Adil wa APR FC, yavuze ko uyu rutahizamu ameze neza yiteguye uyu mukino bityo ko abafana b'iyi kipe badakwiye guhanganyika.
Ati'Jacques Tuyisenge arahari kandi yiteguye neza ku wa Gatandatu nshobora kubibemerera, arahari kandi nk'uko mwabivuze agomba gutsinda ibitego, ibitego nibyo bya ngombwa, ntafite Jacques nagiye ngerageza uburyo bwinshi bw'imikinire yacu kandi twabigezeho.'
Yakomeje agira ati'Jacques ni umuntu w'ingenzi cyane mu buryo bw'iyo mikinire yacu kandi tugomba kumurinda mu buryo ubwo ari bwo bwose.'
Nyuma y'umukino wo ku wa Gatandatu, izakina umukino wo kwishyura tariki ya 5 Ukuboza 2020.
Source : http://isimbi.rw/siporo/article/umutoza-adil-erradi-yatanze-ihumure-ku-bafana-ba-apr-fc
