Mark Meadows ukuriye ibiro bya White House bamusanzemo Covid-19, nkuko abategetsi babibwiye ibitangazamakuru byo muri Amerika.
Ntabwo byahise bimenyekana uburyo Bwana Meadows yanduye. Akenshi yagiye agaragara atambaye agapfukamunwa mu bikorwa bihuriyemo abantu benshi.
Ni we wa vuba aha basanzemo Covid-19 mu bo mu butegetsi bwa Trump. Imaze kwica Abanyamerika barenga 230,000, naho abarenga miliyoni 9 bamaze kuyandura.
Ejo ku wa gatanu, wabaye umunsi wa gatatu wikurikiranya Amerika iciye umuhigo w'abantu bashya benshi banduye ku munsi, barenga 127,000.
Coronavirus yabaye ingingo ikomeye mu zagarutsweho cyane n'abakandida mu kwiyamamaza, mbere y'aya matora ya perezida yo ku itariki ya 3 y'uku kwezi kwa 11.
Ndetse coronavirus yatumye uburyo bwo gutora hifashishijwe iposita bwitabirwa cyane ndetse habaho n'ukwiyongera k'umubare w'abatora hakiri kare, mbere y'umunsi nyirizina w'amatora.
Mu kiganiro na televiziyo CNN mu mpera y'ukwezi kwa cumi, Bwana Meadows yavuze ko Amerika 'itagiye guhagarika icyorezo', avuga ko Covid-19 yatsindwa gusa binyuze 'mu buryo bwo kugabanya ubukana' nk'inkingo n'imiti yo kuyoroshya.
Bwana Meadows yakoranye ingendo na Perezida Trump mu minsi ya nyuma yo kwiyamamaza kwe, ndetse yari ari mu munsi mukuru wo mu ijoro ryo ku munsi w'amatora witabiriwe n'abashyigikiye Bwana Trump babarirwa muri za mirongo, wabereye muri White House.
Perezida Trump n'umugore we Melania ndetse n'umuhungu wabo Barron bose babasanzemo Covid-19, nyuma baza kuyikira. Cyo kimwe n'uko byagenze ku bajyanama be bamwe barimo nka Robert O'Brien, umujyanama wa perezida ku mutekano w'igihugu.
BBC
Source : https://impanuro.rw/2020/11/07/ukuriye-ibiro-bya-trump-bamusanzemo-covid-19/
