Mushambokazi Jordan wari mu bakobwa 20 bari bahataniye ikamba rya Miss Rwanda mu 2018, agiye kurushinga na Mbonyumuvunyi Karim.
Nyuma y'igihe kinini bakundana ariko byaragizwe ibanga, Miss Mushambokazi na Mbonyumuvunyi biyemeje kurushinga ndetse n'amatariki y'ubukwe bwabo yamaze gutangazwa.
Nk'uko bigaragara ku nteguza z'ubutumire mu bukwe bwabo, tariki 23 Mutarama 2021 na 30 uko kwezi nibwo buzataha.
Hatangajwe amatariki y'ubukwe, nyuma y'uko Mbonyumuvunyi avuye kwa Mushambokazi gufata irembo ndetse ababyeyi bagaha umugisha urukundo rwabo.
Mushambokazi ari mu bakobwa b'ikimero gikurura abatari bake bamukurikira ku rubuga rwa Instagram, ni umwe mu bakobwa icumi bahataniye ikamba rya Miss Rwanda mu 2018 ku itike y'Intara y'Amajyepfo.
Mbonyumuvunyi ugiye kubana akaramata na Mushambokazi Jordan asanzwe ari umushabitsi ukorera mu Bushinwa.
Source : https://impanuro.rw/2020/11/24/nyuma-y-igihe-kinini-bakundana-batangaje-itariki-y-ubukwe-bwabo/
