Mohamed Salah rutahizamu wa liverpool yasanzwemo covid-19 ku ncuro ya kabiri #rwanda #RwOT

webrwanda
0

Ibipimo bya kabiri byerekanye ko Mohamed Salah, rutahizamu wa Liverpool n'uw'ikipe y'igihugu ya Misiri, agifite ubwandu bwa coronavirus.

Mu cyumweru gishize, ari kumwe n'ikipe y'igihugu cye, ni bwo uyu mukinnyi w'imyaka 28 bayimusanzemo bwa mbere, nubwo nta bimenyetso byayo yari afite.

Ku munsi w'ejo ku wa gatatu, ishyirahamwe ry'umupira w'amaguru mu Misiri ryemeje ko nanone Salah bamusanzemo Covid-19 ubwo bongeraga kumupima.

Bishoboka ko atazakina imikino ibiri ya Liverpool igiye gukurikiraho, kubera amategeko yo kwishyira mu kato.

Liverpool izakira Leicester City ku cyumweru muri Premier League, no ku itariki ya 25 y'uku kwezi kwa 11 yakire Atalanta mu mukino wa Champions League.

Ku wa kabiri, Salah yanditse ku mbuga nkoranyambaga ati: 'Nifuzaga gushimira buri muntu wese ku butumwa bwo kunkomeza no kunyifuriza gukira. Nizeye ko nzagaruka ku kibuga vuba'.

Liverpool ntacyo yatangaje niba Salah azakina umukino wo ku cyumweru.

Aracyari mu Misiri, ndetse Liverpool izakurikiza amabwiriza ya leta y'icyo gihugu n'aya Premier League ajyanye n'igihe ashobora kongera gukina.

Muri uyu mwaka w'imikino, Salah yagiye abanza mu kibuga mu mikino umunani yose ya Premier League Liverpool yakinnye, ayitsindira ibitego umunani

The post Mohamed Salah rutahizamu wa liverpool yasanzwemo covid-19 ku ncuro ya kabiri appeared first on Kigalinews24.



Source : https://kigalinews24.com/2020/11/19/mohamed-salah-rutahizamu-wa-liverpool-yasanzwemo-covid-19-ku-ncuro-ya-kabiri/

Post a Comment

0Comments

Post a Comment (0)