Ikihebe gikomeye muri Al Qaeda cyishwe #rwanda #RwOT

Abu Muhammad al-Masri, ikihebe cyari gikomeye muri Al Qaeda cyategetse ubugizi bwa nabi bujyanye no gutera ibisasu biturika kuri za Ambasade zitandukanye za Leta Zunze Ubumwe za Amerika muri Afurika, biravugwa ko cyarashwe n'abanya Israeli bari intumwa za US.

Abu Muhammad al-Masr yari ku mwanya wa kabiri mu gutanga amategeko mu mutwe w'iterabwoba wa Al Qaeda ushingiye ku matwara ya gisilamu, bivugwa ko yarasiwe mu mujyi wa Tehran kiri kumwe n'umukobwa we.

Ibinyamakuru bitandukanye bivuga ko Abdullah Ahmed Abdullah wari uzwi nka Abu Muhammad al-Masri yarashwe na ba mudahusha bari kuri moto muri Iran muri Kanama.

Iki kihebe cyari kizwi kubera kugira uruhare mu guturitsa ambasade ya Amerika muri Kenya no muri Tanzania aho abantu barenga 224 baguye muri ibi bitero byabaye muri 1998.

Ikinyamakuru The New York Times kivuga ko izi ntumwa z'abanya Israeli zatumwe na Amerika aribo bamishije urufaya rw'amasasu kuri iki kihebe kigahita gipfa.

Abu Muhammad al-Masr yafatwaga nk'umusimbura wa Ayman al-Zawahiri uyoboye Al Qaeda ubu wasimbuye uwahoze ari kizigenza w'uyu mutwe w'iterabwoba, Osama Bin Laden.

Amerika itajya iva ku izima yari imaze imyaka itari micye ihiga iki kihebe, kimwe na bigenzi bacyo, gusa byarangiye Abu Muhammad al-Masr ariwe uhasize ubuzima.

Iki cyihebe ngo cyiciwe hamwe n'umukobwa wacyo w'imyaka 27 witwa Miriam wari umupfakazi wasizwe n'umuhungu wa Osama Bin Laden witwa Hamza Bin Laden.

Al-Masri ngo niwe wari umutoza wa Hamza wishwe muri Nzeri umwaka ushize na US.

Byavugwaga ko iki cyihebe cyari mu bwihisho muri Iran guhera muri 2003 ndetse ngo cyagiye kigaragara mu mihanda ya Tehran guhera 2015.

Abu Muhammad al-Masr yishwe ubwo yari atwaye imodoka ye yo mu bwoko bwa Renault L90 mu ma saa tatu z'ijoro ryo kuwa 07 Kanama 2020, aho aba bagabo bari kuri moto bamurashe amasasu 5 bakoresheje imbunda yo mu bwoko bwa masotera 4, nuko amasasu arinjira aramwica we n'umugore we.

Ikihebe Al-Masri cyahoze gikina umupira w'amaguru by'umwuga mu Misiri,cyari mu bantu bahigwa cyane na FBI ndetse yari yarashyizeho igihembo cya miliyoni 10 z'amadolari ku zagifata.Yaba Israel cyangwa US ntawe uremeza ko iki cyihebe cyishwe.



Source : https://impanuro.rw/2020/11/15/ikihebe-gikomeye-muri-al-qaeda-cyishwe/

Post a comment

0 Comments