Irushanwa ryo gushaka itike yo gukina CAN 2021 y'abatarengeje imyaka 20, rizaba guhera ku itariki 22 Ugushyingo kugeza ku itariki 5 Ukuboza 2020 muri Tanzania.
Ikipe y'u Rwanda yari yashyizwe mu itsinda A hamwe na Tanzania, Somalia ndetse na Djibouti mu gihe itsinda B rigizwe n'u Burundi, Erythrée, Sudani y'Epfo na Uganda mu gihe itsinda C rigizwe na Ethiopia, Kenya na Sudani.
Mu itangazo FERWAFA yageneye abanyamakuru ku wa Gatanu, yavuze ko Amavubi U-20 atazitabira kubera ko abenshi ari abanyeshuri kandi iri rushanwa rikaba ryarahuriranye no gusubukura ku ishuri kw'abana.
Yagize iti 'Nyuma yo kujya inama no gusuzuma imitegurire y'ikipe y'Igihugu y'umupira w'Amaguru mu batarengeje imyaka 20 (U-20). Nyuma yo gusanga ko gutegura ikipe no kwitabira amarushanwa ya CECAFA U-20 bihuriranye n'itangira ry'amashuri nyuma y'igihe kitari gito amaze afunze kubera icyorezo cya COVID-19, hashingiwe kandi ku ngengabihe y'isubukurwa ry'amasomo agomba gutangira mu byiciro kandi abanyeshuri bakabanza gukorerwa isuzumabumenyi,'
'Nyuma yo kubijyamo inama na Minisiteri ya Siporo (MINISPORTS), Minisiteri y'Uburezi (MINEDUC) hafashwe umwanzuro ko : Ikipe y'Igihugu y'abatarengeje imyaka 20 itakitabiriye amarushanwa ya CECAFA U-20 yari ateganyijwe kubera muri Tanzania guhera tariki ya 22 Ugushyingo kugeza ku ya 6 Ukuboza 2020.'
'FERWAFA iboneyeho kandi kumenyesha Abanyarwanda ko iki cyemezo cyamaze gushyikirizwa Ubunyamabanga bwa CECAFA.'
Mu cyumweru gishize, FERWAFA yari yatangaje ko iyi kipe izatozwa na Kayiranga Baptiste yungirijwe na Bisengimana Justin, mu gihe Amil Khan ariwe wari umutoza w'abanyezamu.
CAN U-20 ya 2021 izaba hagati ya Gashyantare na Werurwe muri Mauritanie, izitabirwa n'ibihugu 12.
