Nk'uko bitangazwa na Kaminuza ya Johns Hopkins yo muri Amerika ivuga ko abantu bamaze kwicwa n' icyorezo cya Covid-19, muri Leta Zunze Ubumwe z'Amerika barenze 250,000, mu gihe ubwandu bwayo bwongeye kwiyongera mu gihugu hose.
Kugeza ubu muri icyo gihugu abarenga miliyoni 11,5 bamaze kwandura coronavirus, muri bo abarenga 250,400 yarabishe.
Amerika ni cyo gihugu cya mbere ku isi kimaze gutangaza abantu benshi cyane banduye coronavirus ndetse n'abo imaze kwica.
Kandi ubwandu nanone bwongeye kwiyongera mu bice bitandukanye by'Amerika, mu cyumweru gishize hari iminsi yaciye umuhigo w'ubwandu bwa mbere bwinshi.
Mu kiganiro yagiranye na BBC dukesya iyi nkuru , Dr Anthony Fauci ukuriye ikigo cy'Amerika cyo kurwanya no gukumira indwara zandura, yavuze ko iki gihugu 'kirimo kujya mu cyerekezo kibi muri iki gihe kijegajega cyane'.
Muri iki gihe, birashoboka ko abantu benshi bagiye kujya bateranira hamwe ari benshi mu ngo zabo kubera ko ubukonje burimo kwiyongera.
Umujyi wa New York â€" umaze igihe ari izingiro ry'iki cyorezo â€" wategetse ko amashuri yose afungwa guhera kuri uyu wa kane, mu gihe ubwandu burimo kwiyongera.
Abategetsi bavuze ko bafashe icyemezo cyo gufunga aya mashuri ya leta ya mbere menshi muri Amerika kubera ko ikigero cy'ubwandu cyarenze 3%. Iki cyemezo kizagira ingaruka ku bana bagera ku 300,000.
Iby' inkingo byo bivuga ko ejo ku wa gatatu, imibare yatangajwe n'ibigo Pfizer na BioNTech bikora inkingo, igaragaza ko urukingo ibyo bigo byakoze rwo gukingira iyi virusi rurinda kuyandura ku kigero cya 94% ku bantu bakuru bafite hejuru y'imyaka 65.
Mu cyumweru gishize, Pfizer na BioNTech batangaje iby'ibanze byavuye mu bushakashatsi bwabo bigaragaza ko urwo rukingo rurinda kwandura Covid-19 ku kigero cya 90% ndetse bavuga ko nta ngaruka rugira ku buzima.
Ibyo byakurikiwe n'amakuru ku rukingo rwakozwe na kompanyi Moderna yo muri Amerika avuga ko rukingira ku kigero kigera hafi kuri 95%, ndetse n'ibindi bitanga icyizere byavuye mu igeragezwa ry'urukingo Sputnik V rwakozwe n'Uburusiya.
