Abantu 7 muri Uganda baraye biciwe mu nyigaragambyo yamagana ifatwa rya Bobi Wine #rwanda #RwOT

Igipolisi cya Uganda gitangaza ko abantu 7 ari bo baguye mu myigaragambyo yabaye kuri uyu wa 18 Ugushyingo 2020, aho abigaragambya basabaga ko Robert Kyagulanyi, uzwi kw'izina rya Bobi Wine arekurwa. Ni nyuma yo gutabwa muri yombi na Polisi ubwo yari mu gikorwa cyo kwiyamamaza. Uyu wamenyekanye cyane mu baririmbyi cyangwa se mubuhanzi, ahanganye bikomeye na Perezida Yoweri Museveni mu matora ategerejwe muri iki gihugu.

Umuvugizi w'igipolisi cya Uganda muri iki gitondo yabwiye BBC dukesha iyi nkuru ko mu gitondo cyo kuri uyu wa kane hari abandi bantu barenga 40 bakomerekeye muri iyo myigaragambyo.

Mu gitondo cy'ejo ku wa gatatu tariki 18 Ugushyingo 2020, Bobi wine yatawe muri yombi n'igipolisi ubwo yari mu kwitegura gutangiza igikorwa cye cyo kwiyamamaza ku mwanya w'umukuru w'iki gihugu ahanganiyeho bikomeye na Perezida Museveni.

Polisi, ishinja Bobi Wine kwegeranya abantu barenga 200 bemewe na Komisiyo y'Igihugu cya Uganda ishinzwe gutegura amatora, imwe mu ngingo zafashwe muri iki gihugu mu rwego rwo kurwanya ikwirakwira ry'icyorezo cya Covid-19.

Ifatwa rya Bobi ryatumye haduka imyigaragambyo ku murwa mukuru Kampala no mu bindi bice bitandukanye nyuma y'aho abakunzi be bumvise ko umuntu wabo( Bobi wine) yahagaritswe n'igipolisi, basaba ko arekurwa.

Igipolisi cya Uganda ntabwo kiramenyesha uburyo abo bantu barindwi bapfuye abandi bagakomereka. Hagati aho, hari amashusho yakwirakwijwe ku mbuga nkoranyambaga yerekana abantu buzuye amaraso, bamwe badakoma, basa n'abarashwe bagapfa.

Munyaneza Theogene intyoza.com



Source : http://www.intyoza.com/abantu-7-muri-uganda-baraye-biciwe-mu-nyigaragambyo-yamagana-ifatwa-rya-bobi-wine/

Post a comment

0 Comments