Ubuyobozi bw'Ikipe y'Umupira w'Amaguru ya Amagaju FC ibarizwa mu karere ka Nyamagabe, bwemeje ko abakinnyi bayo 11 banduye Covid_19, ndetse ko bari mu mubare w'abarwayi bashya Minisiteri y'Ubuzima yatangaje ku mugoroba w'ejo hashize.
Aba bakinnyi banduye mu gihe habura iminsi umunani gusa ngo hatangire imikino ya Kamarampaka y'icyiciro cya kabiri izemeza amakipe abiri agomba kuzamuka mu cyiciro cya mbere, agasimbura Gicumbi FC na Heroes FC zamanutse.
Umuyobozi w' Amagaju FC , Mukiza Emile, yabwiye IGIHE dukesha iyi nkuru ko abakinnyi banduye bamaze gushyirwa ukwabo ndetse ntawe urembye. Ati
'Icyo kibazo ni cyo turagifite, barapimwe basanga bafite ubwo burwayi. Twabatandukanyije n'abandi, ntawe urembye, ntawe urwaye ibindi, inzego zitandukanye ziri kudufasha mu bigomba gukurikira. Ni abakinnyi 11.'
Kuwa 11 Ukwakira, Amagaju yafashe iya mbere, abimburira andi makipe umunani (8) yo muri shampiyona y'icyiciro cya kabiri gupimisha abakinnyi n'abandi bakozi bose icyorezo cya Coronavirus, aho bahise banatangira umwiherero n'imyitozo.
Amagaju aherutse kwemeza Niyibizi Suleiman nk'umutoza mushya, ni imwe mu makipe umunani azahatanira kwinjira mu cyiciro cya mbere, aho mikino ya kamarampaka (Play Offs) yateganijwe kuzaba hagati ya tariki 13-21 Ugushyingo, mbere y'uko shampiyona y'icyiciro cya mbere itangira kuwa 4 Ukuboza 2020.
Source : https://impanuro.rw/2020/11/06/abakinnyi-b-ikipe-y-amagaju-fc-banduye-covid_19/
