Pierre Buyoya wahoze ayoboye igihugu cy'U Burundi akaba aherutse gukatirwa igifungo cya burundu ashinjwa hamwe n'abandi bantu kwica uwahoze ari perezida w'iki gihugu, Melchior Ndadaye, yavuze ko atajya mu Burundi kujuririra iki gihano kuko ngo byaba ari nko kwiyahura.
Ibi Buyoya yabitangaje nyuma y'aho ubutabera bw'u Burundi bumuhamije kugira uruhare mu iyicwa rya Perezida Ndadaye ku wa 21 Ukwakira 1993 nyuma y'igihe gito yari amaze agiye ku butegetsi atsinze amatora, bukamukatira igihano cy'igifungo cya burundu.
Nyuma y'urwo rubanza, Pierre Buyoya ntiyatinze kugira ibyo aruvugaho ashimangira ko rwaciwe mu nyungu za politiki.
Mu kiganiro n'itangazamakuru, abajijwe niba koko azabasha kwitaba ubutabera bw'U Burundi asubitse akazi ke ko guhagararira umuryango wa Afurika Yunze Ubumwe muri Mali no muri Sahel, Pierre Buyoya yavuze ko bidashoboka, avuga ko uru rubanza rwabaye ku itariki 19 Ukwakira ari urubanza rwa politiki rwaciwe mu buryo buteye agahinda hirengagijwe amabwiriza yose y'amategeko. Ati:
'Dufashe rero umwanzuro wo kujurira imbere y'ubucamanza bw'u Burundi, ndetse n'imbere y'inkiko zo hanze igihe nikigera. Hagendewe ku bijyanye n'uburenganzira bwa muntu mu Burundi, ndatekereza ko kwigaragaza hariya ngo ngiye kuburana byaba bihwanye no kwiyahura.'
Merchior Ndadaye wabaye Perezida wa mbere w'u Burundi watowe mu nzira ya demokarasi atsinze Buyoya mu matora, yagiye ku butegetsi ku itariki 10 Nyakanga 1993 yicwa n'abasirikare kuwa 21 Ukwakira muri uwo mwaka amaze amezi atatu gusa ku butegetsi.
Pierre Buyoya w'imyaka 70, kuri ubu ahagarariye ishyirahamwe ry'ubumwe bwa Afrika mu karere ka Sahel. Ntabwo yigeze aburana muri urwo rubanza.
Inyandiko y'urukiko BBC yatangaje, ivuga ko Pierre Buyoya n'abandi bantu 15 â€" benshi bahoze ari aba-ofisiye bakuru mu ngabo z'Uburundi â€" aribo bakatiwe igifungo cya burundu.
Abandi bantu batatu, barimo Bernard Busokoza wigeze kuba Visi Perezida w'Uburundi, bakatiwe igifungo cy'imyaka 20, naho undi umwe agirwa umwere.
Abo bose bakatiwe igifungo banasabwa gutanga bose hamwe indishyi y'akababaro ingana na miliyari 103 mu mafaranga y'amarundi, amafaranga azagenda yiyongeraho gatandatu kw'ijana (6%) buri umwaka kuva umunsi bamenyeshejwe ibihano by'urukiko kugeza bayishuye ku bushake cyangwa ku ngufu.
Pierre Buyoya yatangaje ko kujya mu Burundi kujurira byaba ari nko kwiyahura kuri we.
