Muri iki gitondo cyo ku wa Gatandatu, ubuyobozi bw'ikipe ya Kiyovu Sports, abatoza n'abakinnyi bayo bose berekeje kuri Muhazi mu mwiherero wo kuganira ku buryo bakwitegura umwaka utaha w'imikino.
Ni nyuma yuko iyi kipe yiyubatse cyane mbere y'uko Shampiyona ya 2020/21 itangira.
Uyu mwiherero ubera kuri Muhazi, ubaye nyuma y'umunsi umwe abatoza bose ba Kiyovu Sports barangajwe imbere na Karekezi Olivier, bahawe amasezerano y'imyaka ibiri.
Ku munsi w'ejo, nibwo umutoza Karekezi yavuze ko gutwara igikombe kuri Kiyovu Sports bishoboka, ariko yiteze ko amakipe bazaba bahanganye cyane ari APR FC na Rayon Sports.
Ati:'Ibintu byose birashoboka mu mupira w'amaguru, igikombe dushobora kugitwara. Mu mwaka ushize APR yari hejuru ndetse n'ubu ikomeje kwiyubaka. Ndibaza ko ni ikipe imwe cyangwa Rayon Sports, nshobora kuvuga ko bizaba bigoye kuzikuraho amanota atatu, ariko ibintu byose ni ugukora cyane'.
Kugeza ubu ntiharamenyekana igihe Shampiyona y'Icyiciro cya Mbere mu Rwanda izatangirira, ariko FERWAFA yagaragaje ko idashobora gutangira mbere ya tariki ya 18 Ukuboza 2020.
Source : https://impanuro.rw/2020/10/03/ikipe-ya-kiyovu-sports-yerekeje-mu-mwiherero-kuri-muhazi-amafoto/
