Umucamanza w'Urwego rwasigariyeho inkiko mpuzamahanga zirimo urwari rwarashyiriweho u Rwanda, IRMCT, kuri uyu wa 21 Ukwakira 2020 rwatangaje ko Felicien Kabuga azoherezwa kuburanishirizwa i La Hague mu Buholandi
Uyu umucamanza w'uru rukiko Iain Bonomy niwe wafashe umwanzuro wo kumwohereza mu Buholandi, umwanzuro watangajwe n'uru rwego.
Uyu mucamanza wafashe uyu mwanzuro yavuze ko impamvu ikomeye ari 'urugendo rwambukiranya imigabane, no kuba uru rukiko ubu rutazi uko ubuzima bwa Kabuga bwifashe'.
Mu itangazo ry'umwanzuro we, avuga ko kujyana Kabuga ku kicaro cy'uru rukiko muri Tanzania ari amasaha 11 mu ndege no guhagarara ku bibuga by'indege bitatu. Mu gihe ngo kujya i La Haye 'byoroshye kandi byihuse mu gihe cy'amasaha n'imodoka cyangwa mu isaha imwe n'indege'.
Mu ntangiriro z'uku kwezi urukiko rusesa imanza mu Bufaransa rwemeje ko Kabuga yohererezwa kuri ururukiko rufite ikicaro i Arusha muri Tanzania, rukagira n'ishami i La Haye mu Buholandi.
Kabuga aregwa ibyaha birimo gutera inkunga y'amafaranga jenoside mu Rwanda, uyu wamaze imyaka irenga 20 yihisha ubutabera agafatwa mu kwezi kwa gatanu, ibyaha aregwa yabyise 'ibinyoma'.
Ubu afungiye mu Bufaransa aho yafatiwe.
