Umukinnyi w'umunyarwanda ukina mu kibuga hagati mu ikipe ya El Geish mu gihugu cya Misiri, Muhire Kevin avuga ko ikintu cyatumye atakaza umwanya wo gukina muri iyi kipe ari ibibazo yari amazemo iminsi ariko byakemutse.
Mbere y'uko shampiyona y'icyiciro cya mbere muri iki gihugu ihagarara kubera COVID-19, Muhire Kevin yari umwe mu bakinnyi b'inkingi za mwamba z'iyi kipe ahora muri 11 babanzamo.
Shampiyona yaje kugaruka 16 Kanama 2020 banganya na Pyramids 2-2.
Kuva shampiyona yagaruka uyu musore yagiye agorwa no kubona umwanya wo gukina, rimwe na rimwe akaza asimbuye.
Uku kubura umwanya bya hato na hato, byatumye benshi bibaza icyabaye kuri uyu musore aho bakeka ko yaba yarasubiye inyuma, mu kiganiro na ISIIMBI yavuze ko atasubiye inyuma ahubwo yahuye n'ibibazo ari nabyo byatumye atakaza umwanya.
Yagize ati'oya ntabwo nasubiye inyuma, ni ibabazo nahuye nabyo, ni ibibazo byanjye bwite niyo mpamvu. Wihangane ntabwo nabivuga. Mbere y'aho nakinaga imikino yose ni uko nagize akabazo ariko ubu karakemutse, ubu nta kibazo.'
Kevin Muhire akaba amaze imyaka 2 mu gihugu cya Misiri, akaba yaragiye agiye mu ikipe ya Misr Lel Makasa ayisinyira imyaka 3, umwaka wa mbere yawumaze ari intizanyo mu ikipe ya El Dakhlia, umwaka wa kabira akaba yarawukinnye muri Misr El Geish.
Source : http://isimbi.rw/siporo/article/muhire-kevin-yakomoje-ku-bihe-bikomeye-yari-amazemo-iminsi-mu-misiri
