Header Ads Widget

Technology

Real Madrid yongeye kwihesha ikuzo imbere ya FC Barcelona,Liverpool ihagarika umuvuduko wa Man City #rwanda #RwOT

Ku iki Cyumweru,amakipe y'ibigugu menshi yari yahuye mu mikino y'ishyiraniro aho Real Madrid na Liverpool zatahanye ikuzo imbere y'ibigugu zahuye nabyo muri shampiyona.

Mu mukino wari witezwe na benshi,ikipe ya Real Madrid bitayigoye yatsinze FC Barcelona ibitego 3-1 mu gihe Liverpool yari mu rugo yatsinze Manchester City itari yagatsinzwe muri shampiyona igitego 1-0.

Real Madrid na FC Barcelona zahuriye mu mukino ukomeye w'umunsi wa 9 wa Shampiyona, warangiye ikipe ya Real Madrid yihimuye kuri Barcelona yaherukaga kuyitsinda ibitego 4-0 ubushize.

Mbere yo guhurira muri 'El Clasico' FC Barcelona na Real Madrid banganyaga amanota 22, usibye ko Barca yari imbere ku rutonde rwa Shampiyona kuko ari yo izigamye ibitego byinshi (17) kugeza n'ubu.

Real Madrid yatsinze FC Barcelona ku mukino wa 250 wa El Clasico uhuza ibi bigugu byombi bifite abakunzi benshi ku isi.

Real Madrid yari mu rugo,yafunguye amazamu ku munota wa 12 w'umukino ku gitego cyatsinzwe na Karim Benzema nyuma y'akazi kari kamaze gukorwa na Vinicius Jr wasigaranye n'umunyezamu Ter Stegen amurobye awugarura usanga uyu mufaransa ashyira mu nshundura.

Ntibyatinze ku munota wa 35 w'umukino Federico Valverde yatsinze igitego cya kabiri ku ishoti rikomeye yatereye inyuma y'urubuga rw'amahina nyuma y'umupira mwiza yahawe na Ferland Mendy.Igice cya mbere cyarangiye ari 2-0.

Igice cya kabiri ntabwo Real Madrid yagikozemo byinshi kuko ariyo yayoboye umukino ari nayo mpamvu yaje kwinjizwa igitego ku munota wa 83 na Ferran Torres ku mupira yahawe na Lewandowski.

Real Madrid yabonye penaliti ku munota wa 90 yakorewe kuri Rodrigo Goes wahise anayitera ayishyira mu rushundura bituma biba ibitego 3-1.

Muri uyu mukino,Carlo Ancelotti utoza Real Madrid ntiyari afite umunyezamu we wa mbere, Thibaut Courtois, ariko ntibyamubujije gutsinda uyu mukino.

Iki ni igihombo gikomeye kuri FC Barcelona kuko yagerageje kubaka ikipe kurusha umwaka ushize ariko gutsinda uyu mukino ukomeye byayigoye.

Mu wundi mukino wabaye uyu munsi,Ikipe ya Liverpool yaherukaga gutsindwa na Arsenal ibitego 3-2,yakiriye City yari itaratsindwa na rimwe iyitsinda igitego 1-0.

City yari imaze iminsi iryoherwa n'ibitego bya Haaland,yatunguwe n'imikinire yo ku rwego rwo hejuru ya Liverpool kuko uyu munsi yari yikosoye cyane.

Nubwo benshi batabikekaga,umutoza Klopp yatunguranye atsinda uyu mukino abifashijwemo n'igitego cyiza cyatsinzwe na Mohamed Salah ku munota wa 76 ku mupira yaterewe imbere n'umnyezamu Alisson Becker awutwara myugariro Joao Cancelo aroba umunyezamu Alisson.

Uyu rutahizamu yakoze aka kazi gakomeye nyuma y'aho yari amaze guhusha igitego cyabazwe aho yasigaranye wenyine na Alisson atera umupira hanze.

Liverpool yitwaye nabi mu minota ya nyuma kuko rutahizamu wayo Darwin Nunez yikubiye yanga gutanga umupira kuri bagenzi be bari basigaye ari 3 ku mukinnyi umwe wa City wari usigaye inyuma.

Phil Foden yatsinze igitego muri uyu mukino ariko kiza kwangwa kubera ko Haaland yari yabanje gukorera ikosa kuri Henderson wa Liverpool.

Uyu ntabwo wari umunsi wa Haaland umaze gutsinda ibitego 15 muri shampiyona kuko yahushije ibitego 2 byabazwe.

Mu minota ya nyuma,umutoza Klopp yashyushye mu mutwe ashwana n'umusifuzi wa kane kubera ko yirengagije ikosa ryakorewe Salah bituma ahabwa ikarita itukura.

Mu wundi mukino wabaye,ikipe ya Arsenal iri ku mwanya wa mbere yatsinze bigoranye Leeds United igitego 1-0 cyatsinzwe na Bukayo Saka mu gice cya mbere cy'umukino.

Iyi Arsenal yakinnye umukino mubi,yarokotse kuko yahushijwe penaliti ndetse mu minota ya nyuma hatangwa indi n'ikarita itukura kuri myugariro wayo Gabriel gusa byombi byaje gukurwaho.

Ubu Arsenal iyoboye Premier League n'amanota 27 kuri 23 ya Man City na Tottenham ziyikurikira.

Man United yanganyije 0-0 na Newcastle mu gihe Chelsea yatsinze ibitego 2-0 Aston Villa ibifashijwemo na Mason Mount wabitsinze byombi.



Source : https://umuryango.rw/imyidagaduro/imikino/article/real-madrid-yongeye-kwihesha-ikuzo-imbere-ya-fc-barcelona-liverpool-ihagarika

Post a Comment

0 Comments

Nature