Olivier Giroud yasohotse muri Premier League... - #rwanda #RwOT

Giroud wari umaze imyaka icyenda akina muri shampiyona y'u Bwongereza 'Premier League' kuko yakinnye imyaka itandatu muri Arsenal ndetse akaba yari asoje imyaka itatu muri Chelsea, yakomereje muri AC Milan aho yahawe amasezerano y'imyaka ibiri.

Kuri uyu wa Gatandatu tariki ya 17 Nyakanga 2021, nibwo ikipe ya AC Milan yatangaje ko yasinyishije rutahizamu mushya wakiniraga Chelsea, Olivier Giroud, amasezerano y'imyaka ibiri ndetse bamuha ikaze muri iyi kipe.

Chelsea yari amazemo imyaka itatu, binyuze ku mbuga nkoranyambaga zayo yifurije ishya n'ihirwe Olivier Giroud mu ikipe nshya ndetse banamushimira ubwitange n'umuhate yagaragaje mu gihe yamaze i Londres.

Giroud wari kumwe n'ikipe y'igihugu y'u Bufaransa mu irushanwa rya Euro 2020, avuye muri Chelsea ayihesheje ibikombe bitatu bikomeye, birimo Champions League, Europa League na FA Cup.

Mu mikino 119 amaze I Stamford Bridge, Giroud yatsinze ibitego 39, mu gihe Arsenal yakiniye imyaka 6, yayitsindiye ibitego 105 mu mikino 253.

Umutoza wa AC Milan Stefano Pioli yifuje Giroud kugira ngo azamufashe mu mikino ya Champions League iyi kipe izitabira mu mwaka utaha w'imikino ndetse no muri shampiyona y'u Butaliyani bifuza kwegukana nyuma y'igihe kirekire.

Olivier Giroud yasinyiye AC Milan amasezerano y'imyaka ibiri

Giroud yahawe nimero 9 azajya yambara muri AC Milan



Source : https://inyarwanda.com/inkuru/107662/olivier-giroud-yasohotse-muri-premier-league-yari-amazemo-imyaka-9-yerekeza-muri-ac-milan-107662.html

Post a Comment

0 Comments