COVID : Minisitiri Ngirente aragirana ikiganiro n'Abanyamakuru...Haba hitezwe ingamba nshya ? #rwanda #RwOT

Ibiro bya Minisitiri w'Intebe byatangaje ko Minisitiri w'Intebe, Dr Edouard Ngirente agirana ikiganiro n'Abanyamakuru ku gicamunsi cyo kuri uyu wa Kabiri tariki 29 Kamena 2021.

Iki kiganiro cya Minisitiri w'Intebe Dr Edouard Ngirente, kibaye mu gihe habura amasaha macye ngo icyumweru kimwe gishire mu Rwanda hari kubahirizwa ingamba nshya zo kwirinda icyorezo cya COVID-19.

Izi ngamba zafatiwe mu nama y'Abaminisitiri yateranye ku wa Mbere w'icyumweru gishize tariki 21 Kamena 2021, yafatiwemo amabwiriza mashya yo kwirinda iki cyorezo.

Amwe muri aya mabwiriza arimo guhagarika ingendo zihuza Umujyi wa Kigali n'Uturere ndetse n'Uturere n'utundi, hakabamo kwigiza imbere amasaha yo kugera mu rugo aho ubu byashyizwe saa moya z'umugoroba (19:00').

Aya mabwiriza azamara ibyumweru bibiri kandi yahagaritse imihango yose y'ubukwe yaba iyo gusezerana mu mategeko no mu nsengero.

Ikiganiro Umukuru wa Guverinoma agiye kugirana n'Abanyamakuru kiratambuka ku bitangazamakuru by'Ikigo cy'Igihugu cy'Itangazamakuru kugira ngo kize gukurikirwa n'Abaturarwanda bose.

Ni ikiganiro kandi kigiye kuba mu gihe imibare y'abakomeje gusangwamo ubwandu bwa COVID-19 ndetse n'abahitanwa na yo ikomeje gutumbagira.

Nko mu minsi ibiri gusa ishize, abantu 1 498 basanzwe barwaye iki cyorezo mu gihe muri iyo minsi cyahitanye abantu 16 barimo uruhinja rw'iminsi itanu (5).

UKWEZI.RW



Source : http://www.ukwezi.rw/mu-rwanda/Amakuru-anyuranye/article/COVID-Minisitiri-Ngirente-aragirana-ikiganiro-n-Abanyamakuru-Haba-hitezwe-ingamba-nshya

Post a Comment

0 Comments