Iyi kipe y'Abarashi (The Gunners) nk'uko biyita waraye ukubiswenabi cyane ibitego bitatu byose mu gice cya kabiri cy'umukino na Liverpool yari imaze iminsi itari mike iri mu bibazo.
Mu gihe hasigaye imikino umunani ngo shampiyona irangire, Arsenal iri inyuma amanota icyenda yose ku ikipe iri muri 4 za mbere zifite uburenganzira bwo kujya mu irushanwa ry'i Burayi rihuza amakipe yabaye aya mbere iwabo (Champions League/Ligue des Champions).
Arteta yagize ati: "Baturuhije cyane muri byose.Byose byaduturutseho".
Arsenal yigeze kuba ikipe ikomeye mu mwaka wa 2003/2004 ubwo yatwaraga Premier League idatsinzwe umukino n'umwe,ubu iri ku mwanya wa 9 muri iyi shampiyona y'Ubwongereza, aho biboneka ko amahirwe yonyine isigaranye kugira ngo ishobore kujya muri Champions League, ari uko yatwara igikombe cya Europa League.
Arsenal iheruka gukina muri Champions League mu 2016/2017, kuva icyo gihe ntirabasha kurisubiramo.
Ku wa kane, izakira ikipe ya Slavia Prague yo muri Tchéquie (cyangwa République Tchèque/ Czech Republic) mu mukino wa mbere wa 1/4 cya Europa League.
Arteta asaba abakinyi be guhagarara kigabo nyuma y'amahano baraye bakorewe na Liverpool.
Mu kiganiro n'abanyamakuru nyuma y'umukino, Arteta yagize ati: "Uyu munsi wari umubabaro mwinshi cyane mu ikipe. Ubu ndababaye cyane kuko ni ibintu ntari niteze".
"Ni ukuri ibi bintu ntibigasubire. Nishyize mu mwanya w'ikipe n'abakunzi bayo, ibi ntibishobora kwihanganirwa. Ni ngombwa ko duhaguruka".
"Ngomba gukora ibishoboka byose kugira ngo nsubize ibintu mu buryo. Uyu munsi ibintu ntibyari byifashe neza na gato".
'Abakinnyi ntibizeye ubushobozi bwa Arteta'
Jermaine Jenas,wahoze akina hagati muri Tottenham no ikipe nkuru y'Ubwongereza yanenze uburyo Arteta yakoresheje.
Ati: "Nabonye ikipe itari yizeye ubuhanga bwa Mikel Arteta".
"Byagaragaye ko abakinnyi ba Arsenal batari bamerewe neza. Nta shyaka bari bafite ryo gukina cyangwa ryo gushaka umupira no kwinjiza ibitego".
"Ndi kwibaza umubabaro abakunzi ba Arsenal bafite ubu".
BBC
