Babiri muri bo baganiriye n'itangazamakuru bemera ko barenze ku mabwiriza yo kwirinda ikwirakwizwa ry'icyorezo cya Coronavirus kimaze iminsi cyaribasiye cyane Umujyi wa Kigali, bakavuga ko babirenzeho babizi ariko batazabisubira.
Umwe mu bafashwe yavuze ko batari mu birori, cyakora ngo banywaga inzoga bisanzwe.
Yagize ati "Twari twarengeje umubare w'abagomba kuba bari muri iyo nzu."
Kamaro ukina muri Film Nyarwanda yiswe MBAYA, yabwiye Abanyamakuru ko Police yabafashe bari kunywa inzoga mu nzu ari batandatu.
Yavuze ko ubwo bafatwaga hari n'abaturanyi babo, na bo bafashwe.
Kamaro yavuze ko abafashwe bose ari abaturanyi ba hafi bamwe basurana kuko inzu zegeranye, ngo bafatwa nta muziki wavugaga.
Yagize ati: "Habayeho gusurana kandi bitemewe, abadusuye ni abaturanyi nta n'umwe waturutse ikantarange. Kamaro ati 'Ntatwari twasinze kuko twanyweraga ku gipimo cyo hasi cyane."
Undi witwa Umuhoza Pancarte wafatanywe n'abandi bantu 10 yavuze ko Police yabasanze mu rugo bari gusangira bisanzwe n'inshuti atazi neza umuturage watanze amakuru kugira ngo bafatwe.
Yavuze ko uko biri kose bafashwe bari mu makosa, ati: "Twari twarenze ku mabwiriza yo kwirinda Covid-19 kandi irahari kuko hari abo nzi Covid-19 yishe, nimva hano ndahita nisubiraho nkangurire bagenzi bange gukomeza kwirinda Covid-19."
Umuvugizi wungirije wa Polisi y'igihugu wungirije CSP Afrika Sendahangarwa Apollo yavuze ko Polisi itazahwema gufata aba bantu barenga ku mabwiriza yo kwirinda ikwirakwira rya Covid-19, anashimira abaturage badahwema gutanga amakuru y'aba bantu bagafatwa.
Yagize ati: "Aba bantu uko ari 15, barapimwa Covid-19 kandi biyishyurire ibipimo, ubundi bacibwe amande nk'uko amabwiriza y'Umujyi wa Kigali abivuga."
Aya mabwiriza avuga ko abarenze ku mabwiriza yo kwirinda ikwirakwira rya Covid-19 muri ubu buryo bacibwa amande y'amafaranga ibihumbi 25 ( 25,000 Frw), uwateguye ibirori mu rugo agacibwa ibihumbi 200 Frw.
CSP Afrika Sendahangarwa yongeye kwibutsa abaturage ko icyorezo cya Coronavirus kidakwiye kujenjekerwa kuko kirimo gutwara ubuzima bw'Abanyarwanda benshi, asaba abantu gusubira mu mabwiriza yo kukirinda yashyizweho n'Inama y'Abaminisitiri bakayafata mu mutwe, ndetse bakanayakurikiza kugira ngo Abanyarwanda cyane cyane Abanyakigali bari mu bihe bidasanzwe babe babasha kubivamo amahoro.
