Urupfu rw'uyu mugabo utuye mu Murenge wa Mukura, Akarere ka Huye rwamenyekanye mu gitondo cyo kuri uyu wa Gatatu tariki 9 Ukuboza 2020.
Nyakwigendera bivugwa ko ari mu kigero cy'imyaka 45, ngo ku mugoroba wo ku wa Kabiri nibwo yategewe izi nzoga aho abaturage bavuze ko yazitegewe n'umwana muto ucuruza ubunyobwa.
Abaturage baganiriye na TV1 dukesha iyi nkuru bavuze ko uwo mwana ucuruza ubunyobwa yari yategeye uriya mugabo kunywa inzoga nyinshi z'urwarwa ariko ageze ku icupa rya Gatandatu riramunanira.
Bavuze ko yatangiye gucika intege abantu babibonye ko ashobora kuba atamerewe neza bahita bamujyana kwa mugana ari naho yashiriyemo umwuka.
Ubwo twatuganyaga iyi nkuru twagerageje kuvugisha Umunyamabanga nshingwabikorwa w'Umurenge wa Mukura, Fidèle Ngabo, atubwira ko ari mu kiruhuko, ariko umukozi ushinzwe irangamimerere muri uyu murenge we ntiyabasha kwitaba telefone.
Ubwo aza kuza kuboneka atatwitaba turatangaza icyo ubuyobozi bw'uyu murenge buvuga kuri aya makuru y'umuturage wabwo wishwe n'urwarwa.
