Abakinnyi 10 ba Musanze FC, 5 ba AS Muhanga banduye icyorezo cya COVID-19 #rwanda #RwOT

Nyuma y'ibipimo byafashwe mbere y'uko amakipe arekura abakinnyi bagasubira mu ngo zabo, byagaragaje ko abakinnyi 10 ba Musanze FC banduye icyorezo cya Coronavirus, ni mu gihe muri AS Muhanga ari 5.

Tariki ya 11 nibwo Minisiteri ya Siporo yahagaritse shampiyona y'icyiciro cya mbere mu bagabo mu Rwanda igeze ku munsi wa 3 kubera ko amakipe yarenze ku mabwiriza yo kwirinda icyorezo cya Coronavirus.

MINISPORTS ikaba yarahise inategeka ishyirahamwe ry'umupira w'amaguru 'FERWAFA' ko bagomba kubanza gupimisha abakinnyi b'amakipe yose mbere y'uko basubira mu ngo nzabo.

Amakuru ISIMBI yamenye ni uko iyi kipe ya Musanze FC icumbitse ku Nganzo mu Murenge wa Cyuve mu bipimo 36 by'abakozi bayo n'abakinnyi, basanzemo abakinnyi 10 banduye ni mu gihe mbere hari hagaragayemo umwe nk'uko Minisiteri ya Siporo yabitangaje.

Ku rundi ruhande ikipe ya AS Muhanga, amakuru aturuka mu magepfo y'u Rwanda ni uko abakinnyi bayo 5 nayo banduye iki cyorezo.

Aba bakinnyi banduye bakaba bahise bashyirwa mu kato kugira ngo bitabweho n'abaganga, ni mu gihe abandi bagomba kuguma mu mwiherero bakazongera gupimwa ngo harebwe niba nta bandi banduye.

Minisitiri wa Siporo, Munyangaju Aurore Mimosa aherutse gutangaza ko amakipe arimo Musanze FC, Rayon Sports, APR FC, AS Kigali, Marines FC, Amagaju FC, Rutsiro FC na Alpha FC yagaragayemo iki cyorezo.

AS Muhanga iravugwamo ikibazo cy'abakinnyi 5 banduye icyorezo cya Coronavirus
Musanze FC abakinnyi 10 bayo banduye Coronavirus



Source : http://isimbi.rw/siporo/article/abakinnyi-10-ba-musanze-fc-5-ba-as-muhanga-banduye-icyorezo-cya-covid-19

Post a comment

0 Comments