Umuryango wa Rusesabagina uravuga ko 'amerewe nabi' RCS iravuga ko 'nta n'igicurane arwaye' #rwanda #RwOT

webrwanda
0

Amakuru atangazwa n'umuryango wa Paul Rusesabagina aravuga ko akomeje kuremba kubera indwara asanganywe zisaba gufata imiti ihoraho, mu gihe urwego rw'igihugu rushinzwe imfungwa n'abagororwa ruvuga ko nta n'igicurane arwaye.

Ibi byashyizwe ahagaragara n'Umuvugizi wa Hotel Rwanda Rusesabagina Foundation mu itangazo ryashyizwe ahagaragara rivuga ko amafoto ya vuba y'itangazamakuru 'agararagaza ko ubuzima bwe bumeze nabi.'

'Mu biganiro aheruka kugirana n'umuryango we yababwiye ko agira kuzungerwa, kubabara umutwe, kwitura hasi agata ubwenge, bishobora kuba biterwa n'umuvuduko ukabije w'amaraso utagenzurwa, n'uburyo afunzemo,' ibi ni ibikubiye muri iri tangazo rikomeza rivuga ko yasabye gushyirwa mu bitaro inshuro eshatu bikanga kandi amaze gutakaza ibiro 6.

Ku ruhande rwarwo ariko, Urwego rw'Igihugu rushinzwe Imfungwa n'Abagororwa (RCS) ruvuga ko Rusesabagina ari muzima, kandi 'nta n'igicurane arwaye'.

Umuvugizi wa RCS, SSP Pelly Gakwaya Uwera, avugana na BBC yagize ati: 'Rusesabagina ni muzima. Icyo nakubwira, Rusesabagina nta n'umuriro afite, nta n'igicurane. Nta kibazo afite habe na gito'.

Yongeyeho ko ibivugwa n'umuryango wa Rusesabagina nta kuri kurimo.

Senior Superintendent of Prisons Uwera avuga kandi ko ubuzima bwa Rusesabagina bwitaweho byihariye, kandi avugana n'umuryango we kuri telefone ya gereza nk'abandi bafunze, kuko bitemewe gusurwa kubera Covid. Ni mu gihe muri Gereza ya Kigali haherutse kugaragara abantu 27 banduye Covid-19

Yagize ati: 'Tumuvuza nk'uko tuvuza abandi mu gihe barwaye, we noneho kubera umuvuduko w'amaraso, aravurwa byihariye.'

Hagati aho, Rusesabagina akomeje kuburana ku ifungwa n'ifungurwa ry'agateganyo, aho mu mpamvu ashyira imbere mu gusaba gukurikiranwa adafunzwe avugamo n'uburwayi.

Biteganyijwe ko ku itariki 20 Ugushyingo ari bwo azasubira mu rukiko aburana ubujurire ku ifungwa n'ifungurwa ry'agateganyo.



Source : https://impanuro.rw/2020/11/13/umuryango-wa-rusesabagina-uravuga-ko-amerewe-nabi-rcs-iravuga-ko-nta-nigicurane-arwaye/

Post a Comment

0Comments

Post a Comment (0)