Umuyobozi wa Radio &TV1 akaba n'umuyobozi wa Gasogi United, Kakooka Nkuruza Charles 'KNC' yitabaje Urwego rw'Igihugu rw'Ubugenzacyaha 'RIB' ngo arenganurwe nyuma y'uko ifoto ye ifashwe igahindurwa akagaragara nk'uwambaye ubusa.
Ku munsi w'ejo nibwo hasohotse ifoto n'amashusho bya perezida wa Gasogi United, KNC arimo atera penaliti.
Aya mafoto akaba yarashyizwe ku rukuta rwa Twitter rw'iyi kipe.
Mu gitondo cyo kuri uyu wa Gatatu hakaba hasohotse imwe muri ayo mafoto yahindiwe hakoreshejwe uburyo bw'ikoronabuhanga bwitwa 'Photoshop' bigaragara ko ipantalo yambaye icitse hagati y'amaguru.
Ibi ntabwo byakiriwe neza n'uyu muyobozi aho yahise yandikira RIB ayisaba ko hakurikiranwa umuntu wabikoze akaba yahanwa.
KNC akaba yavuze ko iyi foto yayibonye ku rubuga rwa WhatsApp mu matsinda abiri 'Group WhatsApp' iyitwa RUHAGOYACU FAN GROUP na FOOTBALL FANS RWANDA.
