Ku wa gatandatu, umukinnyi w'umupira wamaguru mu karere ka Lamwo, mu majyaruguru ya Uganda, yapfuye nyuma y'uko bivugwa ko yagiriwe nabi na bagenzi be.
Nyakwigendera Churchill Owaci, ufite imyaka 22, ngo yaba yahohotewe na bagenzi be nyuma yo gukora ikosa riganisha ku izamu mu mukino w'umupira wamaguru wa gicuti wahuje amakipe yombi y'umupira wamaguru.
Umuvugizi wa polisi mu karere ka Aswa, ASP Jimmy Patrick Okema, yemeje ibyabaye avuga ko urubanza rw'ubwicanyi rwanditswe kuri CRB 201/2020 kuri Polisi ya Agoro aho abakekwa bombi bafungiye mu gihe iperereza rikomeje.
Nyakwigendera yari atuye mu mudugudu wa Tumanon A, mu Murenge wa Agoro, ho mu Karere ka Lamwo.
Yakinaga nka myugariro wo hagati mu mukino wahuje amakipe yombi yose abarizwa muri Paruwasi ya Poba nk'uko ikinyamakuru Daily Monitor ducyesha iyi nkuru gikomeza kibitangaza.
Nk'uko byatangajwe n'umuyobozi wa Agoro, Denis Onyon, ngo guhangana gukabije kwabaye hagati y'abakinnyi bo mu ikipe imwe nyuma yo gutsindwa igitego biturutse ku ikosa ryakozwe na Owaci.
Bagenzi be bamwirunzeho, baramuhondagura mbere yo kubatandukanya.
Uyu muyobozi ati:
'Ariko nyuma y'umukino, nyakwigendera mu gikorwa cyo kwihorera yasunitse umwe mu bantu bari bamukubise mbere, ari ku igare biteza indi mirwano. Uyu nyakwigendera yaguye muri metero nkeya uvuye aho imirwano yabereye ahita ajyanwa ku kigo nderabuzima cya Agoro III, aho yatangajwe ko yapfuye nyuma y'amasaha make'.
