Muri Uganda ku kibuga cy'indege cya Entebbe hafungiwe abagenzi 11 bari mu rugendo bashinjwa kuba bafite ibyangombwa bihimbano ko batanduye Covid_19.
Nkuko ikinyamakuru Monitor dukesha iyi nkuru kivuga ko abo ari abagore batatu n'abagabo umunani, benshi muri bo bakomoka muri Ethiopia.
Sibo ba mbere bafashwe baregwa nk'ibi kuva iki kibuga cy'indege cyakongera gufungurwa nk'uko Vianney Luggya umuvugizi w'ikigo gishinzwe indege za gisivirire muri Uganda yabitangaje.
I Entebbe umugenzi asabwa icyangombwa cy'uko atanduye Covid-19 kitarengeje amasaha 72 kugira ngo yemererwe kwinjira, n'ikitarengeje amashaha 120 kugira ngo ahafatire indege.
Aya mabwiriza yubahirizwa kuva tariki 01/10/2020 iki kibuga cy'indege cya Entebbe cyafungurwa nyuma y'amezi atandatu gifunzwe mu kwirinda Covid-19.
Ikinyamakuru Monitor kivuga ko mu cyumweru gishize abakozi kuri iki kibuga cy'indege bavuze ko abantu barenga 50 indege zabasize kubera kwerekana ibyangombwa nk'ibyo bihimbano.
Kugeza ku cyumweru muri Uganda hari hamaze gutangazwa abantu 10,590 banduye coronavirus nk'uko byemezwa na minisiteri y'ubuzima yaho.
