Umukinnyi Nirisarike Salomon akaba ari myugariro wo hagati mu ikipe ya Pyunik FC n'Ikipe y'Igihugu y'u Rwanda 'Amavubi', yamaze kwandura indwara ya COVID-19 i iterwa n'icyorezo cya Coronavirus.
Uyu mukinnyi rero ibi bikaba bisobanuye ko ashobora kutazagaragara mu mikino ibiri u Rwanda ruzesuranamo na Cape Verde tariki 11 na 17 Ugushyingo 2020.
Kuri uyu wa kane tariki 29 Ukwakira 2020, uyu myugariro w'imyaka 24 y'amavuko, we na bagenzi be batanu bakinana muri Pyunik FC basanzwemo icyorezo cya COVID-19 , nk'uko urubuga rw'iyi kipe rukomeje kubitangaza.
Nirisarike Salomon na bagenzi be bagomba kumara ibyumweru bibiri mu kato mu rwego rwo kwirinda gukwirakwiza icyorezo cya COVID-19, bikaba biteganyijwe ko azongera gupimwa nyuma ya tariki 14 Ugushyingo 2020, kugirango harebwe niba azaba yarayikize.
Uyu mukinnyi ni umwe muri 37 bari bahamagawe n'umutoza mukuru w'Ikipe y'Igihugu Amavubi, Mashami Vincent, yagombaga kuzakoresha ahangana na Cape-Verde, gusa uyu mukinnyi bikaba byamaze kwemezwa ko atazaboneka kuri uwo mukino.
Nirisarike Salomon yanyuze mu Isonga mbere yo kwerekeza ku mugabane w'u Burayi mu Bubiligi mu ikipe ya Royal Antrwerp muri 2012 ayivamo muri 2014 yerekeza muri Sint-Truiden, yavuyemo muri 2016 yerekeza muri AFC Tubize zose zo mu Bubiligi, aza kuyivamo muri 2019 ari bwo yerekezaga muri Pyunik yo muri Armenia arimo kugeza uyu munsi.
Nirisarike Salomon yanduye Covid_19 ashobora kutazagaragara mu mikino u Rwanda rugiye kwitabira
