Kuri uyu wa Mbere Amavubi arasubira mu mwiherero yitegura imikino 2 ya Cape Verde mu gusaka itike ya CAN 2022, ikaba yasezereye abakinnyi bagera kuri 5 mu bari bakoze umwiherero mbere.
Tariki ya 9 Ukwakira, Amavubi ni bwo yari yatangiye umwiherero yitegura iyi mikino, ku wa 19 Ukwakira 2020 baje gutanga akaruhuko abakinnyi basubira mu miryango.
Uyu ukaba wari n'umwanya mwiza ku batoza gusesengura uko abakinnyi bitwaye muri iyo myitozo itaritabiriwe n'abakinnyi ba APR FC ndetse n'abakina hanze y'u Rwanda.
Uyu mutoza Mashami Vincent akaba yongeye gutumaho abakinnyi ngo bakomeze umwiherero uri butangire uyu munsi n'ubundi ukabera i Nyamata muri La Palisse.
Mu bakinnyi yatumijeho, ISIMBI yamenye ko abakinnyi bagera kuri 5 muri 23 bari mu mwiherero wabanje bamaze gusezererwa, abo ni Emery Bayisenge, Kalisa Rachid na Ndekwe Felix ba AS Kigali, Iradukunda Eric Radu na Usengiman Faustin ba Police FC, Yannick Bizimana wa APR FC.
Aba bakinnyi bakaba biyongeraho Sugira Ernest ufite ikibazo cy'imvune na we utari bujye mu mwiherero.
Byitezwe ko kandi uyu munsi abakinnyi ba APR FC 10 batari bitabiriye umwiherero, uyu munsi na bo bagomba gutangirana na bagenzi babo umwiherero.
Mu gitondo cyo kuri uyu wa Mbere aba bakinnyi bakaba bazindukiye ku cyiciro gikuru cy'ishyirahamwe ry'umupira w'amaguru mu Rwanda ' FERRWAFA', kugira ngo mbere yo kujya mu mwiherero babanze bapimwe icyorezo cya Coronavirus.
Biteganyijwe ko umukino ubanza wa Cape Verde uzabera muri Cape Verde tariki ya 11 Ugushyingo, ni mu gihe uwo kwishyura uzabera mu Rwanda tariki ya 17 Ugushyingo 2020.
Source : http://isimbi.rw/siporo/article/amavubi-arasubukura-umwiherero-abagera-kuri-5-basezerewe
