Mu gihe habura ibyumweru bitatu ngo habeho amatora ya Perezida wa Leta Zunze Ubumwe z'Amerika ateganyijwe kuba tariki ya 3 y'ukwezi kwa 11. Kuri uyu wa mbere tariki 12 Ukwakira 2020, PerezidaTrump yongeye gusubira mu kwiyamamaza, nta byumweru bibiri birashira bamusanzemo Covid _19.
Abantu babarirwa mu bihumbi bateraniye mu gikorwa cyo kwiyamamaza cyabereye hanze mu mujyi wa Sanford muri leta ya Florida.
Bwana Trump yakomeje kwibasira Bwana Biden nk'ibisanzwe.
Yavuze ko isoko ry'imari n'imigabane rihagaze neza ndetse avuga ku kigo cy'ubwirinzi bwo mu isanzure, nka bimwe mu byo yagezeho ku butegetsi bwe.
Mbere y'imbaga y'abantu â€" benshi muri bo batambaye agapfukamunwa â€" yagaragaje gushidikanya ku buzima bwo mu mutwe bwa Bwana Biden.
Avuga ku gukira Covid-19 kwe, hari aho yavuze ati:
'Bavuga ko mfite ubudahangarwa â€" ndumva nkomeye cyane. Ndibuze kugenda n'amaguru aho ngaho nsome buri muntu wese'.
'Ndasoma abagabo n'abagore beza, ndabaha 'bisou' nini ibyibushye'.
Kwiyamamaza kwe i Florida nta kimenyetso cyagaragaje ko Bwana Trump hari icyo yahindutseho mu kwirinda Covid_19 kubera uburwayi yagize.
Kandi byitezwe ko no mu bindi bikorwa byo kwiyamamaza muri iki cyumweru muri Pennsylvania, Iowa na North Carolina, nta kizahinduka ngo yigengesere yirinda coronavirus.
Abamunenga bavuga ko adashishikariza abantu kwambara agapfukamunwa cyangwa gukurikiza ingamba zo guhana intera hagati y'umuntu n'undi.
Hagati aho, Bwana Biden yanenze imyitwarire ya Bwana Trump, yagize ati:
'Perezida Trump aje i Sanford uyu munsi [ku wa mbere] nta kindi azanye kitari imyitwarire itarimo kwirinda, imvugo y'amacakubiri, no kubiba ubwoba'.
Bwana Biden we mu kwiyamamaza kwe ejo ku wa mbere yakoresheje uburyo burimo kwigengesera kurushaho, ahagarara ahantu habiri muri leta ya Ohio.
Inkuru dukesha BBC ivuga ko Biden we uyu munsi ku wa kabiri aribwo aba ari muri Leta ya Florida yagiye kwiyamamaza.
Amakusanyabitekerezo yo mu gihugu agaragaza ko Bwana Biden arusha amanota 10 Bwana Trump yo kuba yatorwa.
Ariko muri za leta zimwe na zimwe, ayo manota aragabanuka â€" nko muri leta ya Florida, aho arusha Trump amanota 3,7, nkuko muri rusange bigaragazwa n'amakusanyabitekerezo y'ikigo Real Clear Politics.
