Kuri uyu wa 25 Nzeri 2020 Urukiko rwisumbuye rwa Nyarugenge rukorera i Nyamirambo rwatangiye kuburanisha ubujurire ku ifungwa n'ifungurwa rya Paul Rusesabagina uregwa ibyaha 13 birimo kurema umutwe w'ingabo utemewe cyangwa kuwujyamo, gutera inkunga iterabwoba, iterabwoba ku nyungu za politiki n'ibindi.
Yagaragaye mu rukiko ku nshuro ya mbere ku wa 14 Nzeri, icyo gihe atangira kuburana ku ifungwa n'ifungurwa ry'agateganyo.
Ubushinjacyaha bwamusabiraga ko afungwa iminsi 30 mu gihe iperereza rigikorwa, kuko bwagaragazaga ko hari impamvu zikomeye zituma akekwaho ibyaha aregwa.
Rusesabagina we yaburanaga avuga ko ari umuntu w'inyangamugayo, wahawe ibihembo mpuzamahanga ku buryo kuba yaburana ari hanze, nta mpungenge byatera kuko adashobora gutoroka.
Ni nyuma y'aho Urukiko rw'Ibanze rwa Kicukiro rutegetse ko Rusesabagina afungwa iminsi 30 y'agateganyo, agahita ajuririra iki cyemezo.
Uyu munsi Rusesabagina yagaragaye yambaye imyenda y'iroza yambara imfungwa n'agapfukamunwa k'iroza ubwo yari ageze ku rukiko.
