Amaraso y’abakize Covid-19 muri Amerika agiye kwifashishwa mu kuvura abarwayi bashya #rwanda #RwOT

Abategetsi muri Leta zunze ubumwe za Amerika batangaje kuri uyu wa 23 ko hemejwe byihuta amaraso y’abakize icyorezo cya Coronavirus nk’umuti mushyashya wo kuvura iki cyorezo kimaze kwica abarenga 176 000 muri iki gihugu.

Ikigo cy’igihugu cya Amerika gishinzwe kugenzura no kwemeza imiti n’ibiribwa, FDA, cyemeje iyo ngingo mu gihe Perezida Donald Trump aremerewe n’abanyamerika bakomeje kumwamagana bavuga ko yananiwe guhagarika ikwirakwira ry’iki cyorezo.

Ikigo FDA nkuko ijwi rya Amerika ribitangaza, cyemeza ko ubwo buvuzi bukoresheje amaraso y’abakize Covid-19 mu kuvura abarwayi bashya bushobora kurwanya iki cyorezo mu buryo bwihuse no gufasha umurwayi kutaremba.

Mu gihe hari abarwayi muri Leta zunze ubumwe z’Amerika no mu bindi bihugu bamaze kuvuzwa ubwo buryo, abahanga mu buvuzi bo bavuga ko ubu buryo bukwiye kwitonderwa kuko bishobora gutera izindi ngaruka ku buzima.

Ikinyamakuru The Washington Post cyandikira muri Amerika, cyavuze ko abarwayi barenga 70 000 muri Amerika bamaze guterwa ayo maraso.

Munyaneza Theogene / intyoza.com



source http://www.intyoza.com/amaraso-yabakize-covid-19-muri-amerika-agiye-kwifashishwa-mu-kuvura-abarwayi-bashya/

Post a comment

0 Comments