Nyuma yo kugera muri ¼ cy'igikombe cy'Isi cyo mu 1990, abakinnyi b'ikipe y'igihugu ya Cameroun bemerewe inzu na Perezida w'iki gihugu Paul Biya, bakaba bagiye kuzihabwa nyuma y'imyaka 30.
Ni gikombe cy'Isi cyabereye mu Butaliyani, Cameroun ikaba yaranditse amateka nk'igihugu cy'Afurika cyageze kure mu gikombe cy'Isi, aho baviriyemo muri ¼ ikuwemo n'u Bwongereza.
Perezida w'iki gihugu, Paul Biya ari na we ukiyoboye Cameroun akaba yaremereye iyi kipe inzu, gusa baje gutinda kuzibona kuko ngo basabye abakinnyi 22 bagatanga urutonde rw'abantu 44. Nyuma y'uko bikosowe Minisiteri yari ibifite mu nshingano yaje guhinduka iki kibazo kiribagirana.
Ishyirahamwe ry'abahoze bakinira ikipe y'igihugu ya Cameroun bongeye kubyutsa iki kibazo bandikira ibiro bya Perezida wa Cameroun maze Perezida w'iki gihugu Paul Biya ategeka ko aba bakinnyi bahabwa inzu mu murwa mukuru Yaounde.
Bagiye guhabwa izi nzu mu gihe Louis Paul Mfede, Benjamin Massing na Stephen Tataw wari kapiteni wa yo bamaze kwitaba Imana.
source http://isimbi.rw/siporo/article/abakiniye-ikipe-y-igihugu-ya-cameroun-bagiye-guhabwa-inzu-bemerewe-mu-myaka-30-ishize-3-barapfuye
