Myugariro wo mu mutima w'ubwigarizi mu ikipe ya Rayon Sports, Kayumba Soter avuga ko mu gihe gito amaze muri iyi kipe ikintu cyamugoye kikanamubabaza ari uko atabonye umwanya uhagije wo gukina ngo yiyereke abafana b'iyi kipe.
Muri Muatarama 2020 ni bwo uyu musore yasinyiye Rayon Sports amasezerano y'umwaka n'igice, akaba yari yatangiye kuyifasha mu mikino yo kwishyura y'umwaka w'imikino wa 2019-2020.
Atarakina imikino myinshi, muri Werurwe 2020 shampiyona yaje guhagarara kubera icyorezo cya COVID-19 kugeza tariki ya 22 Gicurasi ubwo FERWAFA yatangazaga ko umwaka w'imikino wa 2019-2020 wasubitswe igikombe cyahawe APR FC, shampiyona ikazagaruka hakinwa umwaka w'imikino wa 2020-2021.
Mu kiganiro yahaye ikinyamakuru ISIMBI, Kayumba Soter yavuze ko ikintu kimwe cyamugoye kikanamubabaza ari uko atabonye umwanya uhagije wo gukina ngo yiyereke abakunzi ba Rayon Sports kubera COVID-19.
Yagize ati“nta ngorane nagize mu mikino nakinnye uretse ko tutagize amahirwe shampiyona irangire ngo dukine n'igikombe cy'Amahoro, ikintu cyangoye ni uko ntabonye umwanya uhagije wo kugira ngo nigaragarize abakunzi ba Rayon Sports, icyo ni cyo kintu cyangoye kiranambabaza.”
Akomeza avuga ko muri aya mezi ayimazemo yasanze ari ikipe nziza kandi nk'ibisanzwe yafasha umukinnyi kugera aho yifuza.
Yagize ati“Rayon Sports ni ikipe nkuru namwe murabizi uretse ko twagize ikibazo cy'icyorezo cyugarije Isi muri rusange bituma shampiyona itarangira, gusa ni ikipe nziza yaguha izina, yagufasha kwandika amateka muri rusange.”
Kayumba Soter yinjiye muri Rayon Sports nyuma yo gutandukana na AFC Leopards yo muri Kenya, akaba yaranakiniye andi makipe nka AS Kigali.
source http://isimbi.rw/siporo/article/kayumba-soter-yavuze-ikintu-cyamugoye-muri-rayon-sports-mu-gihe-gito-ayimazemo
