Header Ads Widget

Technology

Abamotari n'abagenzi bategetswe kuba barikingije Covid-19, kubirengaho ni uguhanwa - #rwanda #RwOT

Aya mabwiriza yatangajwe kuri uyu wa Gatanu tariki 7 Mutarama 2022. Nta mpinduka agaragaza ku masaha y'ingendo n'agena igihe abantu bagomba kuba bafungiye ibikorwa byemerewe gukomeza gukora.

Ni kimwe no ku ngingo zijyanye n'abagenzi binjira mu gihugu, bazakomeza gusabwa kuba bataranduye Covid-19 bigaragazwa n'icyemezo cy'uko bipimishije hakoreshejwe PCR kandi bagashyirwa mu kato k'iminsi itatu bakigera ku mupaka.

Ku bijyanye n'amashuri, ababyeyi bari bamaze iminsi bari mu rungabangabo batazi igihe abanyeshuri bazatangirira igihembwe cya kabiri kuko ubusanzwe hatangazwa mbere uburyo abajya ku mashuri bazagenda.

Gusa iri tangazo rikomeza riti 'Amashuri azafungura hakurikijwe ingengabihe yari isanzweho. Amabwiriza arambuye kuri iyi ngingo azatangazwa na Minisiteri y'Uburezi.'

Inzego za leta zo zizakomeza gukoresha 15% by'abakozi ubusanzwe bakorera mu biro hanyuma abandi bakorere mu ngo. Ni mu gihe ku bikorera bo, umubare w'abemerewe gukorera mu biro ari 30% by'abakozi n'ubusanzwe bahakorera.

Abikorera bategetswe 'gukora ku buryo abakozi bose baba barikingije Covid-19 mu buryo bwuzuye'. Rivuga kandi ko Minisiteri y'Ubuzima ishobora gufunga by'agateganyo inyubako zaba iza leta cyangwa iz'abikorera mu gihe bigaragaye ko habonetse umubare munini w'abanduye Covid-19'.

Imodoka rusange zasabwe gutwara gusa abagenzi bikingije Covid-19 ndetse abazabirengaho bazajya bafatirwa ibihano. Ni cyo kimwe n'abatwara moto n'amagare basabwe kujya batwara abikingije gusa.

Itangazo rigira riti 'Abagenzi bagenda kuri moto n'amagare bagomba kuba barikingije Covid-19 ndetse n'ababatwaye kuri moto n'amagare. Abatazabyubahiriza bazafatirwa ibihano.'

Abemerewe kujya mu nsengero mu Mujyi wa Kigali ntibagomba kurenga 30% by'ubushobozi bwazo mu gihe mu bindi bice ari 50%. Hose bagomba kuba barikingije Covid-19.

Naho mu bukwe, kwiyakira birabujijwe. Gusaba no gukwa cyangwa se gusezerana imbere y'ubuyobozi no mu nsengero hemewe abantu batarenze 40 kandi nabwo bikaba byabanje kumenyeshwa ubuyobozi.

Muri restaurant, abakiliya bikingije Covid-19 ni bo bemewe gusa na ho mu tubari gufunga kwatwo ni saa mbili.




Source : http://igihe.com/amakuru/u-rwanda/article/abamotari-n-abagenzi-bategetswe-kuba-barikingije-covid-19-kubirengaho-ni

Post a Comment

0 Comments

Nature