Nyuma yo kunyagirwa na Al Hilal SC, umutoza wa APR FC, Abderrahim Talib yavuze ko we gutsindwa n'iyi kipe nta kibazo kuko adahanganye n'amakipe yo muri Sudani we ahanganye n'ayo mu Rwanda.
Hari mu mukino w'umunsi wa 30 wa Shampiyona y'icyiciro cya mbere mu Rwanda 2025-26 aho Al Hilal SC yayitsinze ibitego 4-0.
Nyuma y'uyu mukino umutoza wa APR FC yavuze ko yatsinzwe kuko yaburaga abakinnyi benshi basanzwe babanza mu kibuga barimo William Togui Mel, Niyigena Clement, Ruboneka Bosco na Ronald Ssekiganda.
Yakomeje avuga ko na none adahanganye n'aya makipe yo muri Sudani kuko we yabwiwe ko ahanganye n'ayo mu Rwanda kandi ayari imbere.
Ati 'Mpanganye n'amakipe yo mu Rwanda simpanganye n'amakipe yo muri Sudani. Kuva natangira irushanwa ni ko nabwiwe, si bo bazatwara igikombe, urebye kugeza ubu ni twe turi ku gikombe.'
Yatangaje ibi mu gihe n'iyo amakipe yo muri Sudani yaba ari yo aza imbere ikipe yo mu Rwanda izaza hafi ni yo izatwara igikombe.
APR FC ubu ikaba ari iya mbere mu makipe yo mu Rwanda aho ari iya gatatu n'amanota 56, Al Merrikh SC ya kabiri ifite 58 mu gihe Al Hilal SC ya mbere ifite 67, aya makipe abiri ya mbere akaba ari ayo muri Sudani.
Source : http://isimbi.rw/simpanganye-n-amakipe-yo-muri-sudani-umutoza-wa-apr-fc.html
