Umuryango Ndayisaba Fabrice Foundation(NFF) binyuze mu ishuri ryayo ry'incuke (Ecole Maternelle Fondation Ndayisaba Fabrice), wasoje icyumweru cyo Kwibuka Jenoside yakorewe Abatutsi ku nshuro ya 27.
Uyu muryango ukaba ari ku nshuro ya 11 wibukaga Jenoside yakorewe Abatutsi muri Mata 1994 bazira uko bavutse.
Buri tariki ya 9 Mata, NNF yibuka abana n'ibibondo bazize Jenoside yakorewe Abatutsi, uyu mwaka ni nabwo icyumweru cyo kwibuka muri NFF cyatangiye, cyasojwe ku munsi w'ejo hashize atriki ya 14 Mata 2021, cyaranzwe cyane n'ubutumwa bwiza bw'ihumure kubarokotse Jenoside yakorewe Abatutsi, ndetse n' Abanyarwanda muri rusange, ubutumwa bwo kubaka igihugu ndetse no gusobanura amateka yaranze igihugu.
Igikorwa cyo kwibuka ku nshuro ya 27 Jenoside yakorewe Abatutsi muri Ecole Maternelle Foundation Ndayisaba Fabrice bitewe n'icyorezo cya Coronavirus, ubutumwa bwagiye butangwa hifashishijwe ikoranabuhanga harimo n'ubuhamya bw'abarokotse Jenoside yakorewe Abatutsi muri 1994.
Hatanzwe ubutumwa bunyuranye bwo gusobanurira abakiri bato ndetse no gukomeza abacitse ku icumu rya Jenoside,
Muri iki cyumweru NFF yifatanyije n'abakinnyi b'umupira w'amaguru barimo Mitima Isaac ukinira Sofapaka muri Kenya, Irambona Eric ukina muri Kiyovu Sports n'abandi benshi batandukanye, yifatanyije kandi n'umuhanzi Munyashoza Dieudonne.
Mu muhango wo gusoza iki cyumweru, Ntamakemwa Remy umwe mu bagize Inama nkuru y' Ubutegetsi ya Ibuka aho yavuze ko iki gikorwa ari cyiza kuko kizafasha abakiri gukura bazi amahano yagwiririye u Rwanda ndetse bagaharanira ko bitazongera kubaho ukundi.
Ati' Ubundi umwana mu muco nyarwanda abarirwa mu cyiciro cy'abanyantege nke bakabaye bitabwaho n'abandi, bityo abateguye bakanashyira mu bikorwa uyu mugambii wa Jenoside yakorewe Abatutsi, bayikoze batababarira abana ndetse babica urw'agashinyaguro aho abicanyi batatinye no kwica inda zitaravuka, ibi bikerekana ubugome ndekamere iyi Jenoside yakorewe Abatutsi yakoranywe.'
Yakomeje agira ati'Kwibuka abana, ibibondo n'impinja bazize Jenoside yakorewe Abatutsi mu 1994, ni uguha icyubahiro n'agaciro abana bazize Jenoside yakorewe Abatutsi no guha umwanya abana bariho ubu kumenya ububi n'ingaruka za Jenoside yakorewe Abatutsi kugira ngo barusheho gufata ingamba zo kuyirwanya no kwimakaza ubunyarwanda nk'indangagaciro ibahuza.'
Umuyobozi mukuru w' Ishuri Ecole Maternelle Foundation Ndayisaba Fabrice ari we Ndayisaba Fabrice na we yatanze ubutumwa aho yakomeje abarokotse Jenoside yakorewe Abatutsi aho yavuze ko bagomba kumva ko batari bonyine. Ibikorwa byo kwibuka muri NFF bizakomereza mu mashuri agize akarere ka Kicukiro guhera muri Kamena.
