Amerika, Afurika y'epfo n'ibihugu byo mu muryango w'ubumwe bw'Uburayi (EU/UE), byabaye bihagaritse gukingira abantu n'urukingo rwa Johnson & Johnson (J&J) rwa Covid-19, nyuma y'amakuru yo kuvura kw'amaraso kudakunze kubaho.Abantu batandatu bagaragaje icyo kibazo mu bantu bahawe doze zirenga miliyoni 6.8, nkuko ikigo cy'Amerika kigenzura ubuziranenge bw'ibiribwa n'imiti (FDA) cyabivuze.
Urukingo rwa Johnson & Johnson rwabaye ruhagaritswe muri EU, aho rwari rwatangiye gutangwa muri iki cyumweru.
Bikurikiye ibindi nk'ibi byabaye ku rukingo rwa AstraZeneca, bigatuma hagabanywa ikoreshwa ryarwo.
Ikigo FDA cyavuze ko kirimo kujya inama ko ruba ruhagaritswe nk''uburyo bwo kwigengesera cyane'. Cyemeje ko umurwayi umwe yapfuye azize ibibazo byatewe no kuvura kw'amaraso, naho undi akaba arembye.
Abo bantu batandatu bose bagaragaweho kuvura kw'amaraso ni abagore bafite hagati y'imyaka 18 na 48, bagaragaza ibimenyetso by'uko kuvura hagati y'iminsi itandatu na 13 nyuma yo gukingirwa nk' uko BBC dukesha iyi nkuru yabitangaje.
Bijyanye n'iyo nama yatanzwe n'ikigo FDA, ahakingirirwa hose muri Amerika bahagaritse gukoresha urwo rukingo kugeza harangiye andi maperereza ku mutekano warwo. Byitezwe ko za leta n'abikorera babikurikiza.
Kugeza ubu Amerika ni yo imaze gutangaza abantu ba mbere bensi ku isi banduye Covid-19, barenga miliyoni 31, n'abarenga 563,000 yishe, aba na bo bakaba ari bo ba mbere benshi ku isi.
Urukingo rwa J&J rwahawe abantu bagera hafi kuri miliyoni zirindwi muri Amerika, bangana na 3% by'abamaze gukingirwa kugeza ubu.
Perezida w'Afurika y'epfo Cyril Ramaphosa ahabwa rumwe mu nkingo za mbere za Johnson & Johnson i Cape Town
Source : https://impanuro.rw/2021/04/14/amakuru-mashya_-covid_19-urukingo-rwa-johnson-johnson-rwahagaritswe/
