Minisiteri y'Ubuzima yatangaje ko Kuri uyu wa Kabiri, habonetse abarwayi bashya 68 hakira abantu 123. Uyu munsj nta wishwe n'icyo cyorezo, abamaze gupfa bagumye kuri 316.Abakirwaye ni 1,892 barimo 6 barembye.
Amakuru ya Covid-19 mu Rwanda:
Habonetse abanduye bashya:68
Abanduye bose:23,603
Hakize:123
Abakize bose:21,395
Abakirwaye:1,892
Abarembye:6
Abakingiwe bashya:0
Abakingiwe kuva ku wa 05/3/2021:348,926
Umuyobozi Mukuru w'Ishami ry'Umuryango w'Abibumbye ryita ku Buzima, Tedros Adhanom Ghebreyesus, yavuze ko urugamba rwo guhangana na Coronvirus rwaranzwe n'urujijo ariko rushobora kurangira mu mezi ari imbere mu gihe hifashishijwe ingamba zikwiriye z'Ubuzima.
Tedros yavuze ko ku Isi abagera kuri miliyoni 780 bamaze gukingirwa, ariko bitatuma abantu birara ko ahubwo bagomba gukomeza kubahiriza ingamba zose zirimo guhana intera hagati no kwambara agapfukamunwa.
Ati 'Natwe turashaka kubona ibikorwa by'ubukungu byongera gufungurwa, ingendo n'ubucuruzi zikongera gusubukurwa.'
Uyu muyobozi yagaragaje ko igihangayikishije magingo aya, ari uburyo ibitaro bikomeje kurengerwa n'umubare munini w'ubwandu cyo kimwe n'abantu bari gupfa kandi ari ibintu byakwirindwa.
Ku Isi, abantu bamaze kwandura Covid-19 ni miliyoni 137,4 mu gihe abapfuye ari 2,9. Leta Zunze Ubumwe za Amerika zimaze kugira ubwandu miliyoni 32 n'abantu 576.466 bapfuye.
