PSG yihimuye kuri FC Barcelona yayikoreyeho 'Remontada'iyisezerera hakiri kare muri Champions League #rwanda #RwOT

webrwanda
0

Nyuma yo gutsindirwa Camp Nou ibitego 4-1 mu mukino ubanza wa 1/16 cya UEFA Champions League 2020/2021,PSG yasabwaga gutsinda ibitego 4-0 kugira ngo ikomeze muri ¼ ariko ntabwo byayikundiye kuko mu mukino wo kwishyura yanganyije igitego 1-1 I Paris.

Muri uyu mukino PSG yagaragajemo imbaraga nke ugereranyije n'uwa mbere,yahiriwe no kutinjizwa ibitego na FC Barcelona,ikomeza muri ¼ bitayigoye.

PSG niyo yafunguye amazamu ku munota wa 31 ku gitego cyatsinzwe na Kylian Mbappe kuri Penaliti ubwo yahanaga ikosa Lenglet yakoreye kuri Mauro Icardi mu rubuga rw'amahina.

FC Barcelona yaje kwishyura iki gitego bidatinze kuko ku munota wa 37 Messi yafashe icyemezo aterera ishoti rikomeye inyuma y'urubuga rw'amahina,umupira werekeza mu rushundura uciye ku munyezamu Keylor Navas.

FC Barcelona yakinaga ishaka kubona ibitego hakiri kare,yaje kubona penaliti ku munota wa 45 nyuma y'ikosa Kurzawa yakoreye kuri Griezmann mu rubuga rw'amahina.

Iyi Penaliti yatewe na Lionel Messi ariko umunyezamu Keylor Navas ayikuramo n'amaguru umupira urazamuka ukubita umutambiko w'izamu uvamo.

FC Barcelona yabonye amahirwe menshi mu gice cya mbere ariko Ousmane Dembele wahabwaga imipira myinshi mu rubuga rw'amahina akayipfusha ubusa.

Igice cya kabiri cyaranzwe no kwiharira umupira kwa FC Barcelona yashakga ibitego 3 ngo nibura yerekeze mu minota 30 y'inyongera,ariko nta na kimwe yabashije kwinjiza.

Umukino warangiye FC Barcelona igerageje gutera amashoti 21 arimo 10 yaganaga mu izamu ariko ntibyayihira mu gihe PSG yateye amashoti 7 arimo 3 gusa yaganye mu izamu.

Nyuma ya Juventus ya Cristiano Ronaldo yaraye isezerewe na FC Porto,na FC Barcelona isezerewe rugikubita.Andi makipe amaze gusezererwa ni RB Leipzig na Sevilla.

Mu wundi mukino wabaye kuri uyu wa Gatatu,Liverpool yatsinze RB Leipzig ibitego 2-0 byiyongera kuri 2-0 yari yayitsinze mu mukino ubanza biba 4-0 mu mikino yombi.

Ibitego bya Liverpool byatsinzwe na Mohamed Salah ku munota wa 70 mu gihe Sadio Mane yatsinze icya kabiri ku munota wa 74.



Source : http://umuryango.rw/imyidagaduro/imikino/article/psg-yihimuye-kuri-fc-barcelona-yayikoreyeho-remontada-iyisezerera-hakiri-kare

Post a Comment

0Comments

Post a Comment (0)