DR Congo: Nyuma yo kwikiza Minisitiri w'Intebe, utahiwe ni Umukuru wa Sena #rwanda #RwOT

webrwanda
0

Umusenateri muri sena ya Repubulika ya demokarasi ya Congo, yanditse ubusabe bwo gukuraho umukuru wa sena Alexis Thambwe Mwamba. Thambwe, ni umuntu usanzwe ari ku ruhande rw'uwahoze ari perezida, Joseph Kabila.

Senateri Valentin Gerengo yandikiye ibiro by'inteko abimenyesha ko Thambwe Mwamba akwiye kuvanwa ku mwanya we, kugira ngo akurikiranwe n'ubucamanza.

Umutwe wa sena wateranye ejo kuwa kabiri tariki 02 Gashyantare 2021 ntiwatangaje kumugaragaro impamvu uwo musenateri ashaka ko ubakuriye yeguzwa, gusa abasenateri bagera kuri 60 bamaze gusinya bashyigikira ibyo, nk'uko ibinyamakuru muri DR Congo bibivuga.

Mu kwezi kwa 12 umwaka ushize wa 2020, ubwiganze mu nteko ishingamategeko bwarahindutse, abashyigikiye perezida Felix Tshikedi baba benshi kurusha abashyigikiye Joseph Kabila. Hatangiye igisa no kwigizayo abategetsi bakuru bo ku ruhande rwa Joseph Kabila, nk'uko umunyamakuru wa BBC i Kinshasa abivuga.

Kuwa gatanu ushize, Minisitiri w'intebe Sylvestre Ilunga Ilukamba, usanzwe ari ku ruhande rwa Joseph Kabila, nawe yegujwe n'inteko ishingamategeko.

Amakuru avuga ko Alexis Tambwe Mwamba arebwa n'Umushinjacyaha mukuru wifuza ko bamuvanaho ubudahangarwa maze agakurikiranwaho ibyo akekwaho byo kunyereza miliyoni 7 z'amadolari.

Tambwe Mwamba nkuko BBC ikomeza ibitangaza, yahakanye ibi ashinjwa byo kunyereza imari ya leta, kandi yemeje ko yiteguye kwegura, mu ijambo rigufi yashyikirije nyuma y'inama ya sena ejo kuwa kabiri.

Munyaneza Theogene / intyoza.com



Source : http://www.intyoza.com/dr-congo-nyuma-yo-kwikiza-minisitiri-wintebe-utahiwe-ni-umukuru-wa-sena/

Post a Comment

0Comments

Post a Comment (0)