Uyu mukandida w'abademokarate yamaze kugira amajwi y'intumwa zitora (electoral votes) arenga 270 asabwa, bishimangira itsinzi ye ku mwanya wa Perezida wa Leta Zunze Ubumwe za Amerika, asimbuye Donald Trump bahatanaga ashaka kuguma ku buyobozi bw'iki gihugu cy'igihangange. N'ubwo ibarura ry'amajwi ritararangira neza, Joe Biden wamaze kurenza amajwi asabwa bigaragara ko aza kurusha menshi Donald Trump kuko muri Leta zisigaye amuri imbere kandi arushaho kumujya imbere buri kanya.
Joe Biden wari wamaze kwizera intsinzi, yavuze ko Abanyamerika bamuhaye inshingano zo kurwanya icyorezo cya coronavirus, guhangana n'ubukungu butifashe neza, imihindagurikire y'ikirere ndetse n'irondabwoko ryabaye akarande.
Uyu mukandida w'abademokarate wiyamamaje nk'ushaka ubumwe bw'Abanyamerika, yavuze ko igihe kigeze ngo "imvugo isesereza ive muri politike" ndetse habeho "gutanga ibitekerezo mu bwubahane".
Ati : "Dushobora kuba tutavuga rumwe ariko ntabwo bivuze ko turi abanzi, turi Abanyamerika".
Urwego rushinzwe gucungira umutekano abategetsi bakuru b'Amerika rwohereje muri leta ya Delaware abo kongerera imbaraga abarinda Bwana Biden.
Urwego rw'indege za gisivile narwo rwagabanyije ingendo zemerewe kuba hejuru y'ikirere cyo mu mujyi wa Wilmington wo muri iyo leta, aho Bwana Biden ari.
Ariko, nta kigaragaza ko mu gihe kigufi kiri imbere Donald Trump aza kwemera kumuha ubutegetsi.
Kuwa gatanu nyuma ya saa sita z'amanywa, Bwana Trump yanditse kuri Twitter ati :
"Joe Biden ntakwiye kwiyitirira umwanya wa Perezida mu buryo butari bwo. Nanjye nshobora gukora nk'ibyo. Ibikorwa byo mu rwego rw'amategeko ubu biratangiye !"
Bwana Trump amaze iminsi avuga ko habayeho uburiganya muri aya matora. Byatumye bamwe mu barepubulikani bagenzi be bavuga ko iyo mvugo ikwiye guhagarara.
