Mu Karere ka Gasabo mu Murenge wa Nduba mu Kagari ka Gasanze,mu Mudugudu wa Nyabitare, Â ahagana saa tanu za mugitondo kuri uyu wa Gatandatu tariki ya 8 Gicurasi nibwo abapolisi bafashe abantu 30 bari mu rugo rwa Rudasingwa Jean Claude w'imyaka 37 bari mu nama yo gutegura ubukwe bwe.
Umuvugizi wa Polisi y'u Rwanda Commissioner of Police (CP) John Bosco Kabera yavuze ko bariya bantu bari bateraniye mu cyumba cy'uruganiro begeranye cyane, ni mugihe nyamara amabwiriza avuga ko abantu bagiye guteranira mu nama barenga 20 bagomba kuba babanje kwipimisha icyorezo cya COVID-19 kandi ntibarenge 30% bitewe n'ingano y'icyumba bagiye guhuriramo.
CP Kabera yongeye ko abantu bagomba kumenya ko igihe cyose bagomba kubahiriza amabwiriza ya Leta ajyanye no kurwanya icyorezo cya COVID-19. Bagomba kubahiriza amabwiriza yose ajyanye n'ubuzima kandi bakamenya ko Polisi y'u Rwanda itazigera irambirwa kugenzura iyubahirizwa ry'amabwiriza.
CP John Bosco Kabera kandi yashimiye abaturage bagize uruhare mu gutuma bariya bantu bafatwa nyuma yo gutanga amakuru.
Rudasingwa Jean Claude ari nawe witegura gukora ubukwe tariki ya 15 Gicurasi 2021 yemeye ko yakoze amakosa yo kurenga ku mabwiriza abisabira imbabazi.
Aba bantu uko ari 30 bajyanywe muri sitade ya ULK kugira ngo bongere baganirizwe ku bukana bw'icyorezo cya COVID-19 ndetse banibutswe amabwiriza yo kukirinda, inzego zibishinzwe zikaba zigomba kubaca amande nk'uko amabwiriza abiteganya.
Rudasingwa Jean Claude yemeye ko yakoze amakosa yo kurenga ku mabwiriza abisabira imbabazi
Abafatiwe mu nzu kwa Rudasingwa bahise bajyanywe muri sitade ya ULK kugira ngo bongere baganirizwe ku bukana bw'icyorezo cya COVID-19
