Bamwe mu bakinnyi b'ikipe ya Rayon Sports banduye icyorezo cya COVID-19, ubu ikipe yose ikaba igiye gushyirwa mu kato kugira ngo hafatwe ibindi bipimo.
Uyu munsi Rayon Sports yari yakinnye umukino ufungura shampiyona umwaka w'imikino wa 2020-2021 na Rutsiro FC i Rubavu, amakipe yombi akaba yanganyije 1-1.
Mugisha Gilbert ntabwo yabanje mu kibuga aho yari muri Stade kubera ko ibisubizo bye byari bitarasohoka, nyuma byaje gusohoka basanga ari muzima ahita ajya mu kibuga mu gice cya kabiri asimbira Iranzi Jean Claude.
Nyuma haje inkuru y'uko Rayon Sports abakinnyi bayo 4 banduye icyorezo cya Coronavirus abandi 9 bakaba bagomba kongera gupimwa(amazina yabo ISIMBI yirinze kuyatangaza).
Umwe mu bakinnyi akaba yemereye ISIMBI ko ari byo ndetse we akavuga ko bose nk'abakinnyi bafite ibemenyetso bya COVID-19.
Ikipe yose ikaba yahise ihabwa polisi iza iyiherekeje kuva i Rubavu kugera mu Nzove aho icumbitse, aho bagomba guhita bajya mu kato k'iminsi iri hagati y'itatu n'itanu.
Mu kiganiro kigufi umuvugizi wungirije w'ishyirahamwe ry'umupira w'amaguru mu Rwanda yahaye ISIMBI, Jules Karangwa akaba yavuze ko ayo makuru ari yo ariko hari raporo batarakira.
Ati'nibyo ariko turacyabikurikirana, hari raporo tutarakira. Bagomba kujya mu Nzove aho bakorera umwiherero hagafatwa ibindi bipimo gukira ngo hataza kubaho kwibeshya.'
Kuba Rayon Sports hari abakinnyi banduye, bivuze ko na Rutsiro bakinnye igomba guhita ijya mu kato nayo abakinnyi bayo bagapimwa.
Source : http://isimbi.rw/siporo/article/abakinnyi-ba-rayon-sports-banduye-coronavirus
