Perezida watowe w'Amerika Joe Biden yahawe icyiciro cya mbere cy'urukingo Pfizer rwa Covid-19, avuga ko yakingiwe kugira ngo yereke Abanyamerika ko 'nta kibazo ruteje ku buzima'.
Bwana Biden yiyongereye ku mubare ukomeje kwiyongera w'abategetsi bafashe urwo rukingo , barimo Visi Perezida Mike Pence na Nancy Pelosi, umukuru w'inteko ishingamategeko umutwe w'abadepite.
Ku cyumweru, hatangiye gutangwa urukingo rwa kabiri rwa Moderna, rwemejwe mu cyumweru gishize.
Ubu bivugwa ko Abanyamerika barenga 500,000 bamaze gukingirwa.
Avugira mu mujyi wa Newark muri leta ya Delaware, aho yakingiwe birimo kunyura kuri televiziyo, Bwana Biden yagize ati: 'Ndimo gukora ibi kugira ngo nereke abantu ko bakwiye kwitegura igihe urukingo ruzaba rubagezeho ngo barufate'.
Ati: 'Nta kintu na kimwe gihari cyo kugirira impungenge'.
Yavuze ko ubutegetsi bwa Trump 'bukwiye gushimirwa ukuntu' kubera gutangiza gahunda y'igihugu y'ikingira.
Jill Biden, umugore wa Bwana Biden, mbere yaho ku wa mbere na we yari yakingiwe, nkuko uyu perezida watowe yabivuze.
Kamala Harris, wiyamamaje hamwe na Bwana Biden akaba ari Visi Perezida watowe, ndetse n'umugabo we Doug Emhoff, biteganyijwe ko bakingirwa bwa mbere mu cyumweru gitaha.
Itsinda ry'abazakorana bya hafi na Bwana Biden ku butegetsi bwe, ryihaye intego yuko Abanyamerika miliyoni 100 bazaba bamaze guhabwa urukingo rwa Covid-19 mu minsi 100 ya mbere y'ubutegetsi bwa Bwana Biden.
Kugeza ubu muri Amerika hamaze gutangazwa abantu barenga miliyoni 18 banduye coronavirus, muri bo abarenga 319,000 yarabishe, nkuko imibare ya Kaminuza ya Johns Hopkins ibigaragaza.
Perezida watowe w'Amerika Joe Biden ubwo yakingirwaga coronavirus mu bitaro byo muri leta ya Delaware
Source : https://impanuro.rw/2020/12/22/perezida-watowe-wa-amerika-joe-biden-yakingiwe-covid-19/
