Patient Bizimana wakunzwe mu ndirimbo zitandukanye, yabwiye INYARWANDA ko umukunzi we yageze ku kibuga cy'indege Mpuzamahanga cya Kigali mu masaha y'umugoroba w'uyu wa Kabiri tariki 1 Ukuboza 2021.
Uyu mukobwa ubarizwa muri Leta Zunze Ubumwe za Amerika yakiriwe n'umukunzi we Patient Bizimana amuha indabo nk'ikimenyetso cy'urukundo.
Ku wa 10 Kanama 2021 ni bwo Gentille yakorewe ibirori byo gusezera ubukumi bizwi nka "Bridal Shower'.
Ibi birori byabereye mu bwato i Miami muri Leta ya Florida muri Leta Zunze Ubumwe za Amerika. Ibi birori byarimo inshuti za hafi za Gentille zirimo na Umwiza Jeaninne mushiki w'umuranyi Patient Bizimana.
Tariki 20 Kamena 2021 ni bwo Patient Bizimana n'umukunzi we Uwera Gentille baranzwe mu rusengero rwa Evangelical Restoration Church Masoro kuzahakorera ubukwe muri uyu mwaka.
Aba bombi bamaze gusezerana imbere y'amategeko. Patient Bizimana na Uwera Gentille bari muri 'Couples' zigera kuri 40 zaranzwe muri ERC Masoro zizakora ubukwe muri uyu mwaka wa 2021.
Mu kurangwa kwa Patient na Gentille, Patient yagiye imbere y'iteraniro atari kumwe n'umukunzi we kuko yari akiri muri Leta Zunze Ubumwe za Amerika - icyakora berekanye ifoto ye ari kumwe n'umusore yihebeye ari we Bizimana Patient.
Ni bwo bwa mbere hari hagaragaye ifoto ya Patient na Gentille bari kumwe dore ko izagiye hanze mu bihe byashize ari izabaga zateranyijwe n'abantu.Â
Aba bombi basezeranye imbere y'amategeko ya Leta babigira ibanga rikomeye ndetse kuva icyo gihe kugeza uyu munsi nta foto yabo n'imwe bari kumwe yigeze ijya hanze.
Patient Bizimana na Karamira Uwera Gentille utuye muri Leta Zunze Ubumwe za Amerika muri Leta ya Tennessee mu mujyi wa Nashville, bagombaga kuba barakoze ubukwe mu mpera za 2020, bakomwa mu nkokora n'icyorezo cya Covid-19.
Patient Bizimana yakiriye umukunzi we mu gihe bitegura kurushinga mu minsi iri imbere
Muri Kanama, Gentille yakorewe ibirori bya 'Bridal Shower' byabereye muri Amerika
Mushiki wa Patient Bizimana yari kumwe na Gentille mu bwato
