Urubuga rwa Facebook rwasibye videwo y'uwahoze ari Perezida w'Amerika Donald Trump kuri paji y'umukazana we Lara Trump.
Mu kwezi kwa mbere uru rubuga nkoranyambaga rwahagaritse Bwana Trump ku kurukoresha, nyuma y'imyigaragambyo yakozwe n'abamushyigikiye ku nteko nshingamategeko i Washington.
Lara Trump washakanye na Eric Trump yagaragaje videwo ari kuganira na Donald Trump ku bibazo bitandukanye mu kiganiro cyaberaga kuri televiziyo Fox News.
Nyuma yaho, yatangaje ifoto y'ubutumwa (screenshot) yohererejwe na Facebook bumuburira ku ikurwaho ry'iyo videwo.
Ubutumwa bwa email bwoherejwe n'uvuga ko yitwa 'Katelyn' bugira buti: 'Bijyanye no guhagarika ku rubuga twakoreye konti za Donald Trump zo kuri Facebook na Instagram, ubundi butumwa bwo mu ijwi rya Donald Trump buraza gukurwaho kandi bivemo no kugabanya ikoreshwa ry'iyi konti'.
Guhagarika konti ya Facebook ya Trump byabaye ku itariki ya 7 z'ukwezi kwa mbere , hashize umunsi habaye imyigaragambyo ku nyubako ya Capitol ikorerwamo n'inteko.
Ku butegetsi bwe Trump yakundaga gukoresha imbuga nkoranyambaga nka Facebook mu kwirinda ibitangazamakuru bisanzwe
Source : https://impanuro.rw/2021/04/01/urubuga-rwa-facebook-rwasibye-ijwi-rya-trump-kuri-paji-yumukazana-we/
