Avugira muri leta ya Delaware, uyu perezida watowe yavuze ko hacyenewe guhuza ibikorwa mu rwego rwo guhangana n'iki cyorezo cya coronavirus.
Yavuze ko "nta gushyira mu gaciro na busa" biri mu kuba Perezida Trump yaranze kwemera ko yatsinzwe amatora, nubwo ku mpande zombi z'abarepubulikani n'abademokarate harimo abamusabye kubikora.
Ku mbuga nkoranyambaga, Michelle Obama, umugore wa Barack Obama wahoze ari Perezida w'Amerika, yagize ati: "Ibi si umukino".
Biden yabonye amajwi 306 y'intumwa zitora (electoral college) - uburyo Amerika itoramo perezida - arenza ikigero cy'amajwi 270 ubundi aba acyenewe ngo umukandida atorerwe kuba perezida.
Nyamara ariko Bwana Trump, umurepubulikani, ku wa mbere mu gitondo yanditse kuri Twitter ati: "Natsinze Amatora!"
Itsinda ryari rishinzwe kwamamaza Trump ryatanze ibirego mu nkiko ryamagana uko amajwi yabazwe mu matora yo ku itariki ya 3 y'uku kwezi.
Ikigo cya leta 'General Services Administration' (GSA) gishinzwe gutangiza ubutegetsi bwa perezida mushya, ntabwo kiremera intsinzi ya Bwana Biden na Kamala Harris watorewe kuba visi perezida.
Ibyo bituma hari amakuru y'ingenzi ya leta badahabwa ubusanzwe ahabwa abagize ubutegetsi bwitegura kujyaho.
Abajyanama b'uyu perezida watowe bavuze ko kuba Trump yaranze guhererekanya ubutegetsi bivuze ko itsinda rya Biden ryahejwe mu bikorwa bijyanye no guteganya uko gahunda yo gutanga urukingo rwa Covid-19 izagenda.
Mu ijambo rye ejo ku wa mbere, avuga ku kuba ihererekanya ry'ubutegetsi ryaradindiye, Bwana Biden yagize ati: "Hari uwaba yiyumvisha ibi? Bijyanye no kurokora ubuzima bw'abantu, mu by'ukuri, ibi ntabwo ari ugukabya".
Yongeyeho ati: "Abantu benshi bashobora gupfa niba tudahuje ibikorwa".
Bwana Biden yavuze ko gutanga urukingo ari "igikorwa cy'ingenzi cyane".
Yavuze ko niba itsinda rye rigombye gutegereza kugeza ku itariki ya 20 y'ukwezi kwa mbere - ubwo azaba arahizwa - ngo ribone gutangira gahunda yo gutanga urukingo, rizaba ryacyererewe "igihe kirenga ukwezi, ukwezi n'igice".
Abajijwe niba azashishikariza ba guverineri ba za leta gusubizaho amategeko ya guma mu rugo, uyu perezida watowe yabererekeye icyo kibazo, ahubwo asaba abategetsi gushishikariza abaturage kwambara agapfukamunwa.
