Muri Tanzania Perezida John Magufuli yatorewe manda ya kabiri n'amajwi arenga 84%. Ibi byatangajwe ku mugaragaro kuri uyu wa Gatanu tariki ya 30 Ukwakira 2020.
Uwamuguye mu ntege mu bo bahatanaga ni Tundu Lissu wagize amajwi 13%, nkuko byatangajwe n'akanama k'amatora.
Ariko abatavuga rumwe n'ubutegetsi bari bamaze gutangaza ko batemera ibyavuye mu matora ya perezida yabaye ku wa gatatu, bavuga ko yabayemo uburiganya.
Bwana Magufuli yatsindiye gutegeka Tanzania kuri manda ya kabiri â€" ari nayo ya nyuma iteganywa n'itegekonshinga â€" y'imyaka itanu, nyuma yo gutorwa na miliyoni 12,5 muri miliyoni 15,9 zatoye.
Ishyaka rye 'Chama Cha Mapinduzi' (CCM) ryari risanzwe riri ku butegetsi, ryanatsinze n'ubwiganze bw'amajwi mu matora y'abagize inteko ishingamategeko, ritsindira imyanya 227 ku myanya 229 yatangajwe.
Akanama k'amatora ka Tanzania kavuze ko hafi kimwe cya kabiri cy'abari biyandikishije ko bazatora batatoye.
Ku wa kane, Tundu Lissu, ukomeye mu batavuga rumwe n'ubutegetsi, yavuze ko atazemera ibyavuye mu matora avuga ko aya 'atari amatora ugendeye ku mategeko ya Tanzania n'amategeko mpuzamahanga'.
Yavuze ko udusanduku tw'amatora twakozwemo uburiganya. Bwana Lissu wari umukandida w'ishyaka CHADEMA, yanavuze ko indorererezi z'ishyaka rye zangiwe kwinjira mu biro by'amatora.
Semistocles Kaijage ukuriye akanama k'amatora, yahakanye ibyo birego by'uburiganya. Yavuze ko ibirego by'impapuro mpimbano z'itora nta shingiro bifite.Nk' uko tubikesha BBC yanditse iyi nkuru.
Perezida Magufuli w'imyaka 61, yari ahatanye n'abandi bakandida 14.
Source : https://impanuro.rw/2020/10/31/tanzania-john-magufuli-yatsindiye-kuyobora-manda-ya-kabiri/
